काठमाडौं – देशमा कोरोना संक्रमण बढेसँगै नेपालमा अझै केही महिना सिनेमा हल सञ्चालन नगर्ने निष्कर्षमा नेपाल सरकार पुगेको छ ।
सरकारको यो निर्णयले सिनेमा हल सञ्चालक चिन्तित भएका छन् ।
सिनेमा हलका सञ्चालकहरुको संस्था नेपाल चलचित्र संघका महासचिव एवं प्रवक्ता अशोक शर्माले सिनेमा हल नखुल्दासम्म ऋणको ब्याजमा सघाउन सरकारसँग माग गरेका छन् ।
यो विषयमा आफूहरूले अर्थ, सञ्चारलगायतका मन्त्रालयका मन्त्रीलाई भेटेर अनुरोध गर्दा पनि सुनुवाइ नभएको उनको गुनासो छ ।
यता कोरोना नियन्त्रण तथा रोकथाम उच्चस्तरीय समन्वय समितिले आगामी भदौ मसान्तसम्म मुलुकका सिनेमा हल बन्द गर्ने सुझाव मन्त्रिपरिषद्लाई बुझाएको छ ।
उक्त सुझावअनुसार अझै तीन महिनासम्म सिनेमा हल नखुल्ने पक्का छ । सोही कारण सिनेमा हलका सञ्चालकहरु चिन्तित भएका हुन् ।
नेपाल चलचित्र संघ प्रवक्ता अशोक शर्माका अनुसार फागुन अन्तिमदेखि बन्द भएका सिनेमा हल कहिले खुल्ने भन्ने टुंगो छैन र सबैभन्दा अन्तिममा मात्र हल खुल्ने देखिएको छ ।
‘तर सरकारले हामीसँग ७ असारभित्र जसरी पनि सिनेमा हलको आयकर बुझाउन ताकेको छ,’ शर्मा भन्छन्— ‘हाम्रो सिनेमा हल चार महिनादेखि बन्द भए पनि गत माघ(फागुनको कमाइ एवं आयकरको पैसा र थप ऋण लिएर कर्मचारीको तलब खुवाउने कार्य भइरहेको छ । त्यसैले, अहिलेको अवस्थामा कर तिर्न हामीसँग पैसा छैन र बन्द सिनेमा हलको बिजुली खर्चदेखि जग्गा भाडासम्म तिर्नु छ । बैंकको ऋण र त्यसको ब्याजले हल सञ्चालकलाई उठीबास लगाउने अवस्था आएको छ ।’
प्रवक्ता शर्माले अहिलेको अवस्थामा सरकारले फिल्म हल सञ्चालकलाई कुनै पनि प्रकारको आर्थिक सहुलियतको राहत नदिएकोमा दुःख व्यक्त गरेका छन् ।
उनले भनाइ छ -‘नेपालमा अब भदौसम्म मात्र हैन, कोरोना पूर्ण साम्य नभएसम्म सरकारले सिनेमा हल खोल्न दिनेछैन र सरकारको निर्देशन सिनेमा हल सञ्चालकले पूर्ण रूपमा मान्नुपर्नेछ । भोलि कोरोनाको अवस्था सामान्य भए पनि ऋण तिर्न नसकेका कारण अहिलेका आधाभन्दा बढी हललाई बैंकले लिलाम गर्ने अवस्था आउनेछ । त्यस्तो अवस्थामा आफूहरूले बैंकलाई हलको चाबी र लालपुर्जा जिम्मा लगाउनुबाहेक अरू विकल्प रहने छैन ।’
