गोरखा समाचारदाता
काठमाण्डौं – काठमाण्डौं मेडिकल कलेजका स्वास्थ्यकर्मीमै कोरोना संक्रमण देखिएपछि सबै सेवा बन्द गरिएको छ ।
चिकित्सक र स्वास्थ्यकर्मीमै कोरोना संक्रमण देखिएपछि काठमाडौं सिनामंगलस्थित काठमाडौं मेडिकल कलेज ‘केएमसी’को सबै सेवा बन्द गरिएको हो ।
अस्पतालमा कार्यरत २ स्वास्थ्यकर्मी र २ अन्य बिरामीमा संक्रमण पुष्टि भएपछि अस्पतालले आज (बुधबार) देखी सेवा बन्द गरेको छ । अस्पतालमा उपचारका लागि गएका विरामीबाट स्वास्थ्यकर्मीमा कोरोना संक्रमण सरेको देखिएपछि अस्पतालले अर्को सूचना प्रकाशित नभएसम्मका लागि सेवा बन्द गरिएको सुचना प्रकाशित गरेर सबै सेवा बन्द गराएको छ ।
अस्पतालले आकस्मिक लगायतका सबै विभाग निर्मलीकरण गर्नुपर्ने भएकाले तत्काललाई सेवा बन्द गरिएको सूचनामा उल्लेख गरेको छ । बिरामी र स्वास्थ्यकर्मीलाई कोरोनाको संक्रमणको जोखिम नहोस भनेर यस्तो निर्णय गरिएको अस्पतालले जनाएको छ ।
देशभर हालसम्म २० जना स्वास्थ्यकर्मीलाई कोरोना संक्रमण देखिएको स्वास्थ्य मन्त्रालयले जनाएको छ । संक्रमितमध्ये ५ जना निको भइसकेका छन् । हालसम्म काठमाण्डौं ५ जनामा, धनकुटामा ४ जनामा, दाङमा २ जनामा, सप्तरीमा २ जनामा, बाँके, पर्सा, बारा, कपिलवस्तु, रुपन्देही, रौतहट र धनुषामा १÷१ जना स्वास्थ्यकर्मीलाई संक्रमण देखिएको हो ।
