गोरखा समाचारदाता
काठमाण्डौं – राजपरिवारको एउटा वंश नास भएको आज १९ वर्ष पुरा भएको छ ।
२०५८ साल जेठ १९ गते दरबारभित्र भएको हत्याकाण्डमा तत्कालीन राजा वीरेन्द्र शाहको वंश नै नाश भएको हो ।
राजपरिवारका १० जनाको एकै चिहान भएको १९ बर्ष बितिसक्दा सम्म पनि घटनाको चुरो सम्म फेला पार्न सकेको छैन । विश्व इतिहासमै सबै भन्दा डरलाग्दो मानिएको यो घटनाको पर्दाफास कहिले हुने हो नेपाली जनता ब्यग्रताका साथ कुरीरहेका छन् ।
जेठ १९ को शुक्रबारको दिन नारायणहिटी दरबारभित्र राजा वीरेन्द्र, रानी ऐश्वर्य, युवराज दीपेन्द्र, अधिराजकुमार निराजन, अधिराजकुमारीहरु श्रुति, शान्ति राज्यलक्ष्मी सिंह, शारदा राज्यलक्ष्मी शाह, शाहज्यादी जयन्ती राज्यलक्ष्मी शाह, कुमार खड्गविक्रम शाह र धीरेन्द्र शाहको एकै निमेशमा हत्या भएको थियो ।
घटनामा कोमल शाह, शोभा शाही, कुमार गोरखशमशेर राणा र केतकी चेस्टर घाइते भएका थिए । घटनापछि तत्कालीन सरकारद्वारा गठित समितिले छानबिनपछि तयार पारेको प्रतिवेदनले घटना तत्कालीन युवराज दीपेन्द्रबाटै भएको ठहर गरे पनि यसलाई कुनै पनि नेपाली र विश्वका धेरैले मानिसले विश्वास गरेका छैनन् ।
अहिलेसम्म त्यो हत्या कसले र किन गर्यो भन्ने यकिन तथ्य बाहिर आउन सकेको छैन । वीरेन्द्रको वंश नाशपछि नेपालमा राजतन्त्र धेरै समय टिक्न सकेन । माओवादीको शसस्त्र द्वन्द्व र राजनीतिक दलहरुको जनआन्दोलन पछि नेपाल गणतान्त्रिक मुलुक घोषणा भयो । राजा ज्ञानेन्द्र शाह नै नेपालको इतिहासमा अन्तिम राजा बने ।