गोरखा समाचारदाता
काठमाण्डौं – नेपालको नयाँ नक्सालाई आधिकारिकता दिन संविधान संशोधन विधेयक प्रतिनिधिसभामा पेश गरिएको छ ।
कानुन, न्याय तथा संसदीय मामिला मन्त्री शिवमाया तुम्वाहाङफेले नेपालको संविधान (दोस्रो संशोधन) विधेयक, २०७७ संसद बैठकमा पेश गरेकी हुन् ।
भारतले अतिक्रमण गरेको नेपालको भूमी लिम्पियाधुरा, लिपुलेक, कालापानी समेटेर नेपालको नयाँ नक्सा जारी गरेपछि सरकारले संविधानको अनुसूची ३ मा व्यवस्था भएको नेपालको निशान छापबारे संशोधन गर्न लागेको हो ।
संविधान संशोधनपछि निशान छापमा रहेको पुरानो नेपालको नक्सालाई परिवर्तन गरी नयाँ नक्सा अध्यावधिक हुनेछ ।
संशोधन विधेयकमा प्रमुख प्रतिपक्षी दल नेपाली काँग्रेसको समेत समर्थन रहेकाले यो सजिलै पारित हुने छ । संविधान संशोधनका लागि संसदमा दुई तिहाई सांसदको समर्थन चाहिन्छ ।
यसअघि जेठ १४ गतेको संसद् बैठकमा नै संविधान संशोधन विधेयक पेश गर्ने कार्यक्रम रहेकोमा नेपाली कांग्रेसका सभापति शेरबहादुर देउवाले पार्टीको केन्द्रीय कमिटी बैठकबाट पास गर्न समय मागेपछि विधेयक पेश गर्ने कार्यसूची अन्तिम समयमा हटाइएको थियो ।
