आफ्नो जन्मभूमि दुख्दा आफ्नो पुर्खाले जोगाएर राखेको मुलुकमा समस्या आउँदा कसलाई दुख्दैन र ? पराइ देशमा गएर कर्म गर्दैमा केही सफलता पाउँदैमा आफ्नो मातृभूमिलाई लत्त्याउन कसैले सक्दैन, कसैले औँला उठाउँदा चुप बस्न सक्दैन । नेपाल पछिल्ला केही दिन यता निकै अप्ठ्यारो परिस्थितिबाट गुज्रिरहेको छ । एकातिर कोरोना सङ्क्रमण दिनानुदिन बढ्दै जानु अर्को तिर छिमेकी मुलुक भारतले सिमाना अतिक्रमण गर्दै सडक पुर्याउनु ।
यसरी नेपाललाई कुनै आधिकारिक सूचना नगराई नेपाली भूमि लिम्पियाधुरा, लिपुलेकमा भारतले आफ्नो अधीन जमाउनुलाई नेपालीले सामान्य लिने कुरै भएन । यसैको विरुद्ध आवाज उठिरहेको छ । सरकारले पनि लिपुलेक लिम्पियाधुरा सहित नेपालका स्थानलाई समेटेर नेपाली नक्सा सार्वजनिक गरिसकेको छ । जसलाई सारा नेपालीले सफलताको एउटा कदमको रूपमा लिएका छन् । यस खुसीयालीमा नेपालमा रहेका नेपालीले मात्र खुसी साटेका छैनन् प्रवासमा बस्ने नेपालीले पनि निकै हर्ष मानेका छन् । आखिर आफ्नो देशको स्वधिनताको कुरा हो ।
यसै बिच विगत लामो समय अर्थात् भनूँ आफ्नो करियर भारतमा बनाएर सफलता पाएकी नेपाली अभिनेत्री मनिषा कोइरालाले पनि देशको खुसीयालीमा आफ्नो पनि खुसी बाँडेकी थिइन् । मनिषाले परराष्ट्र मन्त्री प्रदीप ज्ञवालीले नेपालको नयाँ नक्सा पारित भएको विषयमा गरेको ट्विटलाई मनिषाले रि-ट्विट गरेकी थिइन् । ‘हाम्रो सानो देशको आत्मसम्मान कायम राख्न सफल भएकोमा धन्यवाद । अब हामी तीन महान् देशहरूबिच शान्तिपूर्ण र सम्मानजनक संवादका लागि आशावादी छौँ’ लेखेकी थिइन् । यही ट्विटलाई लिएर भारतीय मिडिया मात्र होइन भारतीय जनता समेत उनीमाथि खनिएका छन् ।
उनलाई भारतको खाएर चीनको इसारामा चल्ने भन्दै उनको खण्डन गरिएको छ । यसरी उनीमाथि भारतीय मिडिया खनिनु अनि एक नागरिकले आफ्नो देशको लागी देखाएको प्रेमलाई लिएर प्रोपोगाण्डा निर्माण गर्नु निकै अपरिपक्वताको उदाहरण हो । मनिषाको विरोध भएसँगै नेपाली जनता एवम् सेलिब्रेटी कलाकारहरू एकजुट भएका छन् । उनीहरूले एक सचेत नागरिकले आफ्नो देशको खुसी र दुखमा साथ दिनु त्यो पनि आवश्यक परेको बेला निकै सरहानिय रहेको विचार राखिरहेका छन् । कलाकार निर्माता दीपकराज गिरीले नेपाली छोरी भएकाले नेपालको पक्षमा बोल्नु कुनै अनौठो कुरा होइन र भारतीय मिडियाले यस कुरालाई बङ्गाएर प्रस्तुत गर्नु नै उनीहरूको समस्या रहेको ब ताएका छन् ।
उनले मनिषाले कतै पनि भारतको विरोध गरेर चीनको समर्थन नगरेको पनि खुलाए । यसै गरी कलाकार विल्सन विक्रम राईले पनि आफू मनिषाको साथ रहेको ब ताएका छन् । यसै विषयमा गायिका इन्दिरा जोशीले पनि मनिषाको समर्थन गर्दै आफ्नो विचार राखेकी छिन् । उनले अभिनय क्षमताका कारण मनिषाले बलिउडमा थुप्रै योगदान दिएको, उनले बलिउडलाई थुप्रै उत्कृष्ट चलचित्र दिएको, त्यहाँ उनले कर तिरेकी छिन । यो कुनै व्यक्तिगत कुरा नभएर सेवाको आदान–प्रदानको कुरा हो लेखेकी छिन् । यसै गरी महानायक राजेश हमाल ले पनि भारतको पछिल्लो गतिविधि हामीलाई स्वीकार्य छैन भन्दै आफ्नो विचार राखेका छन् ।
हमालले फेसबुकमा भिडियो नै सार्वजनिक गरेर आफ्नो धारणा राखेका हुन् । उनले भारतको पछिल्लो समयको गतिविधि स्वीकार्य नभएको उल्लेख गरेका छन् । उनी भन्छ, ‘सम्पूर्ण नेपाली जनताले आफ्नो सीमाको विषयमा कुनै पनि खालको सम्झौता गर्दैनन् इतिहास नै साक्षी छ कि, लिम्पियाधुरा, कालापानी र लिपुलेक नेपालकै भू-भाग हो’ । साथै नेपाल र भारतबिच उठेको सिमानाको समस्याले सिङ्गो देशका नागरिकलाई जस्तै आफूलाई पनि मर्माहत बनाएको बताएका छन् । उनले भारतले सिमानाको समस्यालाई इतिहास, तथ्याङ्क र प्रमाणको आधार हेरेर कूटनीतिक तवरमा समस्या समाधान गर्न सुझाव दिएका छन् ।
