गोरखा समाचारदाता
काठमाण्डौं – नेपालमा बिहिबार बिहान पुनः १७ जना संक्रमित फेला परेको छ ।
प्रादेशिक जनस्वास्थ्य प्रयोगशाला विराटनगरमा गरिएको परीक्षणमा नयाँ संक्रमित फेला परेको सरकारले पुष्टी गरेको हो । यो संगै अब नेपालमा कोरोना भाइरस (कोडिभ–१९) को संक्रमितको संख्या ४४४ पुगेको छ ।
गएराति झापाको कचनकवल गाउँपालिकाको क्वारेन्टाइनमा रहेका थप १५ जना, धनकुटाका ३४ वर्षीय पुरुष र धरानका ५२ वर्षीया महिलामा संक्रमण पुष्टि भएको हो ।
कोरोना संक्रमित देखिएका सबै केही दिन अघि मात्र भारतबाट आएका हुन् । पछिल्लो समय झापामा कोरोना संक्रमितको संख्या २७ पुगेको छ ।
बुधवार मात्रै कपिलबस्तु, बाँके, धनकुटा र नवलपरासी जिल्लामा रहेका ४० जनामा संक्रमण पुष्टि भएको थियो । कपिलवस्तुमा १३ जना संक्रमित थपिएका छन् । संक्रमितहरु कपिलवस्तुको बिजयनगर र महाराजगञ्ज गाँउपालिकाका बासिन्दा हुन् । बाँकेको नरैनापुरका ५ र खजुराका १ पुरुषमा पनि संक्रमण देखिएको थियो ।
धनकुटामा ४ पुरुष र १ महिलामा र नवलपरासीको सुस्तामा १ पुरुषमा संक्रमण देखिएको हो । संक्रमित सबैको स्वास्थ्य अवस्था सामान्य रहेको स्वास्थ्य मन्त्रालयले जनाएको छ । बुधवार थपिने संक्रमितहरु ३ देखि ४८ वर्ष उमेरका ७ महिला र १८ पुरुष हुन् ।
