गोरखा समाचारदाता
गोरखा – गोरखाको विभिन्न गाउँपालिकाबाट स्वाब संकलन गरिएको छ ।
नोबल कोरोना भाइरस (कोडिभ–१९) को आशंकामा जिल्ला भित्रको ३ गाउँपालिकाबाट स्वाब संकलन गरिएको हो ।
शहिदलखन गाउँपालिकाको नामजुङ, आरुघाट गाउँपालिकाको आरुघाट र बारपाक सुलिकोट गाउँपालिकाको ताकुमाझ लाकुरीबोटबाट विभिन्न मानिसहरुको स्वाब संलकन गरिएको जिल्ला स्वास्थ्य कार्यालयका कोरोना फोकल पर्सन नारायण अर्यालले बताए । ‘गाउँपालिकाको अनुरोधमा हामीले नामजुङ र आरुघाट क्षेत्रबाट संकलित स्वाब पोखरा पठाएका हौं’ उनले भने ।
पछिल्लो समय सिन्धुपाल्चोक बाह्रबिसे माईती भएकी महिला राजधानीको टिचिङ अस्पतालमा सुत्केरी भई उपचारको क्रममा धुलिखेल अस्पतालमा ज्यान गए पछि उनीमा कोरोना संक्रमित भएको पुष्टी भएको थियो । सुत्केरी भएर सोही वाडमा बसेर गोरखा नामजुङ फर्किएकी महिलाको परिवारको पनि स्वाब संकलन गरेर पोखरा पठाईएको छ ।
शहिद लखन गाउँपालिका ९ को डाडाँ गाउँकी उनी संगै रेहका श्रीमान, बच्चा, जेठानी, जेठानी र उनीहरुको छोरीको स्वाब संकलन गरी पोखरा पठाईएको छ । त्यस्तै गरी सोही क्षेत्रमा रहेको २ वटा एम्बुलेन्सका चालक र केही दिन अगाडी मात्र भारतबाट आएका १ जना गरी ९ जनाको स्वाब पोखरा पठाईएको जिल्ला स्वास्थ्य कार्यालयले जनाएको छ ।
भारतबाट आएका ब्यक्तिलाई भने क्वारिन्टीनमा राखिएको छ ।
त्यस्तै गरी जिल्लाकै आरुघाट गाउँपालिकाबाट पनि ११ जनाको स्वाब संकलन गरी पोखरा पठाइएको छ ।
भारत र देशको विभिन्न स्थानबाट आरुघाट आएकाहरुलाई आरुघार र थुमीको क्वारिन्टीनमा राखिएको छ । माथिका २० जनाको स्वाब मंगलबार संकलन गरिएको कोरोना फोकल पर्सन अर्यालले जानकारी दिए ।
त्यस्तै गरी आज (बुधबार) पनि जिल्लाको बारपाक सुलिकोट गाउँपालिकामा केही स्वाब संकलन गरिने भएको छ ।
गाउँपालिकाको ताकुमाझलाकुरीमा टिचिङ अस्पतालमा बच्चालाई जन्म दिएर जेष्ट ३ गते आएकी एक सुत्केरी महिलाको स्वाब संकलनका लागि जिल्ला स्वास्थ्य कार्यालयको टोली त्यस तर्फ गएको छ ।
सुत्केरी गराउनका लािग बैशाखको १७ गते टिचिङ पुगेकी ति महिला, उनको श्रीमान र नवजात शिशुको आज स्वाब संकलन गर्न लागिएको बारपाक सुलिकोट गाउँपालिकाका अध्यक्ष विण्णु भट्टले बताए । ‘यो बाहेक पनि हामीले एम्बुलेन्सका चालक र केही दिन अघि देशको विभन्न स्थानबाट पालिका भित्र आएका मानिसहरुको पनि स्वाब लिन भनेका छौं’ अध्यक्ष भट्टले भने ।
जिल्लामा पछिल्लो समय स्थानिय पालिकाको अनुरोधमा पिसिआरको लागि स्वाब संकलन कार्यलाई तिब्र बनाईएको छ ।
