गोरखा समाचारदाता
झापा – झापाको घेराबारी क्षेत्रमा जवरजस्ती नेपाल प्रवेश गर्न खोज्ने भारतीयहरुलाई रोक्न हवाई फायर गरिएको छ ।
कचनकबल गाँउपालिका १ घेराबारीमा सनिबार राति सयौँको संख्यामा नेपाल पस्न खोज्ने भारतीयलाई रोक्न सीमामा तैनाथ सुरक्षाकर्मीले हवाई फायर गरेको हो ।
सशस्त्र प्रहरी बल दुई नम्बर हेडक्वार्टर भद्रपुरले घरेलु हतियारसहित १५० जना जतिको संख्यामा भारतीय नागरिक नेपाल पस्न खोजेपछि उनीहरुलाई रोक्न हावामा एक राउण्ड फायर गरिएको जानकारी दिएको छ ।
उनीहरु १२५ नम्बरको सीमास्तम्भ नजिकबाट नेपाली सुरक्षा चौकीमा हुलहुज्जत गर्दै प्रवेश गर्न खोजेका थिए । नेपाली सुरक्षाकर्मीले हवाई फायर गरेपछि उनीहरु भागेर तितरवितर भएका थिए ।
भारतीय नागरिकले नेपाली भूमिमा लगाएको मकैबाली उठाउनका लागि जबर्जस्ती गर्ने क्रममा झापाको सीमा क्षेत्रमा नेपाली सुरक्षा चौकीमा भएको यो तेस्रो आक्रमण प्रयासको घटना हो ।
एक साताअघि झापा गाउँपालिका ४ सुकुम्बासी बस्तीमा १३१ नम्बरको सीमास्तम्भ नजिक रहेको नेपाली सुरक्षा चौकीमा भारतीय नागरिकले हुलहुज्जत गर्दा २ राउण्ड हवाई फायर भएको थियो ।
यसैगरी डेढ साताअघि झापाको कचनकबलस्थित सीमा क्षेत्रमा तैनाथ नेपाल प्रहरीको टोलीमाथि भारतीयले आक्रमणको प्रयास गरेका थिए ।
