गोरखा समाचारदाता
काठमाण्डौं – काठमाण्डौंको पेप्सीकोलास्थित सनसिटी अपार्टमेन्टमा आरडीटी विधिबाट कोरोना भाइरस परीक्षण सुरु भएको छ ।
सनसिटी अपार्टमेन्टको ब्लक ‘ए’ मा बस्दै आएका २ जनामा मंगलबार कोरोना भाइरस संक्रमण पुष्टि भएपछि उक्त अपार्टमेन्टमा रहेकाहरुको परीक्षण थालिएको हो ।
ब्लक ‘ए’ मा बस्दै आएका एकै परिवारका १ जनामा आरडिटीबाट गरिएको परीक्षणमा कोरोना पोजेटिभ देखिएको थियो । तर पीसीआर बिधिबाट गरिएको परीक्षणमा २ जनाको मात्र कोरोना पुष्टि भएको थियो ।
आज ब्लक ‘ए’ मा रहेका ९० परिवारका २४३ जनाको परीक्षण थालिएको छ । गत चैत ८ गते सनसिटी अपार्टमेन्ट वेलफेयर सोसाइटीको चुनावमा संक्रमित परिवारका एक सदस्यले सहभागिता जनाएकाले अपार्टमेन्टमा रहेका सबैको परीक्षण थालिएको हो । सनसिटी अपार्टमेन्टमा रहेका ५ वटा ब्लकमा ५०० परिवारका करिब १ हजार ५०० जना बस्दै आएका छन् ।