गोरखा समाचारदाता
गोरखा – नोबल कोरोना भाइरस (कोडिभ–१९) बाट प्रभावितहरुका लागि गोरखा नगरपालिकाले राहत वितरणको तयारी अन्तिम चरणमा पुगेको छ ।
दैनिक ज्यालादारी गरेर खानुपर्ने तथा अत्यन्त न्यून आयस्तर भएकाहरुकालागि वितरण गर्न लागिएको राहतको विवरण संकनल कार्य सकिएको भन्दै नगरपालिकाले राहत वितरणको तयारी थालेको हो ।
नगरपालिकाले आज (आईतबार) खाद्यान्नको खरिद पुरा गरेर १४ वटा वडा सोमबार सम्म पुरयाउने लक्ष्य राखेको नगरपालिकाका मेयर राजनराज पन्तले बताए । ‘एउटै पसलबाट सामान दिन सक्ने अवस्था आएन । त्यसैले हामीले चामल खाद्य संस्थानको गोरखा बजारमा रहेको डिपोबाट लिने र अन्य सामाग्रीकोलागि आजै खरिद प्रकृया पुरा गरेर भोली सम्ममा वडामा पुरयाउने लक्ष्य राखेका छौ’ भन्छन् मेयर पन्त ।
ठुलो संख्यामा खाद्य सामाग्री खरिद गनुपर्ने भए पछि गोरखा बजारमा रहेको खाद्यान्न पसलले सामान दिन नसकेको हो । सोही कारण खाद्य संस्थानमा रहेको जिरा मसिनो चामल खरिद गर्ने र दाल, तेल, नुन जस्ता सामाग्री बजारमा रहेको थोक बिक्रेताबाट खरिद गर्न लागिएको गोरखा नगरपालिकाले जनाएको छ ।
नगरपालिकाले दैनिक ज्यालादारीमा जीवन निर्वाह गरेका र हाल दैनिक गुजारा चलाउन कठिनाइ परी सहयोग चाहिने ५ जना सम्मको परिवारलाई १० देखी १५ केजी चामल, ५ केजी आटा, १.५ केजी दाल, १ लिटर खानेतेल र १ केजी नुन दिने तयारी गरेको छ ।
१४ वटा वडा रहेको गोरखा नगरपालिकामा ३ हजार ११५ जनाले राहत पाउने देखिएको छ । नगरपालिकाले राहत संकलनकालागि खाद्य बैंक समेत संञ्चालन गरेको थियो । खाद्य बैंकमा अहिले सम्म गोरखा उद्योग बाणिज्य संघ, गोरखा युथ क्लब, गोरखा जिल्ला फुटबल संघ, नेपाली काँग्रेस वडा नम्बर ३ नगर समिति, गोरखा जेसिज, नेपाली काँग्रेस वडा नम्बर ६ नगर समितिले नुन, तेल, चामल र दाल जस्ता सामाग्रीहरु सहयोग गरेको नगरपालिकाले जनाएको छ ।
अन्य केही संघ संस्थाले भने नगरपालिकालाई स्वास्थ्य सामाग्रीहरु प्रदान गरेका छन ।
