गोरखा समाचारदाता
काठमाण्डौ – पूर्व राजा ज्ञानेन्द्र शाहले कोरोना संक्रमण नियन्त्रण र रोकथामका लागि २ करोड रुपैयाँ सहयोग उपलब्ध गराएका छन् ।
उनले हिमानी कोषमार्फत सरकारको कोरोना भाइरस संक्रमण, रोकथाम, नियन्त्रण र उपचार कोषमा सहयोग रकम उपलब्ध गराएका हुन ।
सहयोग रकमले कोरोना रोकथाममा भुमिका निर्वाह गर्ने विश्वास पूर्व राजाले ब्यक्त गरेका छन् । पूर्व राजा साहले कोरोना संक्रमण नियन्त्रणका लागि सबैले आ–आफ्नो ठाँउ र क्षमतावाट केही न केही योगदान पुरयाउनु अनिवार्य भै सकेको पनि बताएका छन ।
लकडाउन बाध्यात्मक अनिवार्यता भएपनि यसको पालनामा गैर जिम्मेबार हुने छुट कसैलाई पनि नभएको सन्देशमा उल्लेख छ । पूर्वराजाले नेपाली जनताले दुःखको समयमा अभाव र समस्या झेलेर पनि संक्रमण बिरुद्ध लडन अनुशासन र धैर्यता देखाएको भन्दै प्रशंषा पनि गरेका छन ।
पूर्व राजाले सेना, प्रहरी र सञ्चारकर्मीले पुरयाएको योगदानको प्रशंषा समेत गरेका छन् ।
सन्देशमा राहत, उद्दार र ब्यवस्थित बन्दोबस्त जुटाउन सरकारी र गैर सरकारी सबै पक्षवाट समन्वयकारी ढंगमा मानवीय सेवा भएकोमा प्रशंषा गर्दै यसलाई अझै प्रभावकारी बनाउन पनि आग्रह गरेका छन् ।
