गोरखा समाचारदाता
काठमाण्डौं – सरकारले विदेशबाट फर्केर क्वारेन्टीनमा नबस्ने र सम्पर्कमा पनि नआउनेलाई कारबाही गर्ने भएको छ ।
कोरोना रोकथामसम्बन्धी उच्चस्तरीय समितिको आइतबार बसेको बैठकले क्वारेन्टाइनमा नबस्ने तथा सरकारको सम्पर्कमा नआउनेहरुलाई कारबाही गर्ने निर्णय गरेको हो ।
चैत १ बाट नेपाल आएकाहरुलाई होम क्वारेन्टाइनमा बस्न अनिर्वाय गरिएको थियो । तर अहिले पनि धेरैले त्यसलाई पलना गरेका छैनन् ।
संक्रमित भएर पनि लुकेर बस्ने, जति सम्पर्क गर्दा पनि नआउने प्रवृत्ति देखिएकाले संक्रमण रोग ऐनको दफा अनुसार कडा कैद सजाय गर्ने निर्णय भएको समिति सचिवालयका प्रवक्ता सचिव नारायण विडारीले जानकारी दिए । समितिले क्वारेन्टाइनमा सुरक्षाकर्मी परिचालन गर्ने तयारी गरेको छ ।
त्यस्तै समितिले चीनबाट ल्याइएका सबै सामग्रीहरू आवश्यक स्थानमा पठाउने निर्णय पनि गरेको छ । बैठकले नेपाल आउने अन्तर्राष्ट्रिय उडानमा लगाएको प्रतिबन्ध आउँदो बैशाख ३ तीन गतेसम्म लम्ब्याउने निर्णाय पनि गरेको छ ।
त्यस्तै बैठकले नेपालको सीमा क्षेत्रमा अलपत्र परेका नेपालीलाई प्रवेश दिने भएको छ । तर उनीहरु स्थानीय तहले बनाएको क्वारेन्टाइनमा अनिवार्य बस्नुपर्नेछ ।
भारतीय सुरक्षाकर्मीले नेपालतर्फ पठाएका तर सीमा नाका बन्दका कारण दशगजा क्षेत्रमा अलपत्र परेका नेपालीलाई प्रवेश दिने निर्णय गरेको समिति सचिवालयका प्रवक्ता सचिव विडारीले जानकारी दिए । साथै उनीहरुलाई स्थानीय तहले बनाएको क्वारेन्टीनमा अनिवार्य बस्नुपर्ने व्यवस्था मिलाइने समितिले जनाएको छ ।
