एजेन्सी – इरानको तेहरानमा दुर्घटना भएको युक्रेनी एयरलाइन्सको विमानमा रहेका सबैको मृत्यु भएको छ । इरानियन स्टुडेन्ट न्यूज एजेन्सी (इसना) ले विमानमा सवार सबै जनाको मृत्यु भएको जनाएको हो । हाल शव संकलन गर्ने कार्य भइरहेको जनाइएको छ ।
बोइङ ७३७ मा चालक दलका सदस्य र १८० यात्रु रहेको बताइएको छ । तेहरानस्थित इमाम खोमेनी अन्तर्रा्ष्ट्रिय विमानस्थलबाट उडेको केही बेरमा नै विमान दुर्घटनामा परेको हो । विमान बिहान ५ बजेर १५ मिनेटमा युक्रेनको राजधानी केइभस्थित बोरिस्पिल विमानस्थलसम्म उडान गर्ने तालिका थियो ।
तर उक्त विमान बिहान ६ बजेर १२ मिनेटमा मात्रै उडेको थियो । इरानले इराकमा रहेको अमेरिकी सैन्य आधार शिविरमा आक्रमण गरेको केही घण्टापछि यो दुर्घटना भएको हो । तर विमान दुर्घटनासँग मिसाइल आक्रमणको कुनै सम्बन्ध नरहेको बताइएको छ ।
इरानको अर्धसरकारी समाचार संस्था आइएसएनले प्राविधिक कारणले विमान दुर्घटनामा परेको उल्लेख गरेको छ । इसराले सार्वजनिक गरेको भिडियोमा विमान जमिनमा ठोक्कएपछि ठूलो आगलागी भएको देखिएको थियो ।
तस्विर गुगल
