गोरखा समाचारदाता
काठमाण्डौं – प्रतिनिधि सभा, विकास तथा प्रविधि समितिले सूचना प्रविधिको सम्बन्धमा व्यवस्था गर्न बनेको विधेयक पारित भएको छ । समितिको आइतबार बसेको बैठकमा बहुमतले विधेयक पारित गरेको हो ।
अब केही दिन भित्रै विधेयक प्रतिनिधि सभामा पेस गरीने छ । दुवै सदनबाट बिधेयक पास भएपछि कानुन बन्नेछ भने कानुन बनेपछि कुनै व्यक्तिलाई सामाजिक सञ्जाल मार्फत जिस्क्याउने, होच्याउने, घृणा वा द्वेष उत्पन्न गराउने, चरित्र हत्या गर्ने वा गाली बेइज्जती मानिने विषयवस्तु सामाजिक सञ्जालमा सम्प्रेषण गरेमा ५ वर्षसम्म कैद र १५ लाख रुपैयाँसम्म जरिबाना हुने ब्यवस्था गरीएको छ ।
विधेयकले सामाजिक सञ्जालमा कसैलाई जिस्क्याउँदा हुने सजाय र राष्ट्रिय एकता र स्वाधीनतामा खलल पुग्ने कुनै विषय सम्प्रेषण गर्दा हुने सजायलाई बरावर गरेको छ । एक पटक सम्प्रेषण गरिसकेको सूचना हेरफेर गरे वा मेटाए वा आर्थिक लाभ पुर्याउने नियतले यस्तो कार्य गरे विषयवस्तु हेरेर ३ वर्षसम्म कैद वा ५ लाख रुपैयाँसम्म जरिबाना वा दुवै सजाय हुन सक्ने प्रावधान पनि विधेयकमा राखिएको छ ।
विधेयकका १३१ दफामध्ये ३६ बुँदामा संशोधन भएको थियो । फरक मत राख्ने सांसदहरुको ८ बुँदा पनि संशोधनमा समावेश गरी पारित भएको हो।
विधेयकमा प्रावधानहरुमा प्रमुख विपक्षी कांग्रेसले फरक मत राखेको छ । कांग्रेसको फरक मतका बाबजुद समितिबाट विधेयक पास भएको हो । विधेयक संविधानको मर्म र भावना विपरीत भएको र यसले नागरिक स्वतन्त्रता, मौलिक हक हनन गर्ने कांग्रेस सांसदहरुको दाबी छ ।
विधेयकले फेसबुक, ट्वीटर, इन्स्टाग्रामलगायतका सामाजिक सञ्जाल सम्बन्धित कम्पनीले नेपालमा दर्ता गर्नुपर्ने प्रावधान समेत राखेको छ ।
