गोरखा समाचारदाता
गोरखा – गोरखाको कुसुण्डेमा सोमबार बिहान छोरीको घरमा गएकी आमाको मृत्यु भए पछि प्रहरीले अनुसन्धानका लागि एक स्थानिय युवालाई नियन्त्रणमा लिएको छ ।
जिल्लाको अजिरकोट गाउँपालिका ४ पोखरी डाँडा बस्ने ७० बर्षिय दुरमाया नेपालीको छोरीको घरमा सोमबार बिहान मृत्यु भएको थियो । नेपालीको मृत्यु पछि प्रहरीले स्थानिय २२ बर्षिय सुनिल नेपालीलाई नियन्त्रणमा लिएर अनुसन्धान थालेको छ ।
जिल्ला प्रहरी कार्यालय गोरखाका प्रहरी नायब उपरिक्षक मित्रबन्धु शर्माका अनुसार बिहानै मदिरा सेवन गरेर मृत्तकका छोरी कुमारी नेपालीको घरमा पुगेका सुनिल बिच विवाद भएको र सोही विवादमा दुरमायालाई हातपात भएको आशंकामा नेपालीलाई नियन्त्रणमा लिएको हो ।
मृत्तक महिलाको शरिरमा चोट भने नभएको गोरखा प्रहरीले जानकारी दिएको छ । नेपालीलाई जौबारी प्रहरी चौकीका प्रहरी निरिक्षक रामचन्द्र घिमिरेको टोलीले नियन्त्रणमा लिएको थियो ।