गोरखा समाचारदाता
धनकुटा – सवारी दुर्घटनामा मृत्यु भएका मृतकका आफन्त र स्थानीयबासीको अवरोधका कारण बन्द रहेको कोशी राजमार्गको हिले–सिधुवा सडक खण्ड ७ घण्टापछि सुचारु भएको छ । मृतकका परिवारलाई उचित क्षतिपुर्ति उपलब्ध गराउँने, घाईतेलाई उपचारको व्यवस्था गर्ने लगायत सहमतिपछि साँझ ७ बजेबाट सडक अवरोध हटेको हो ।
छ थर जोरपाटी गाउँपालिका २ फलैचामा आईतबार दिउँसो करिव १२ बजे हिलेबाट जोरपाटीतर्फ जादै गरेको को.२ ह ६६११ नम्बरको टेम्पु र विपरीत दिशाबाट आईरहेको को.१ ख ६९१२ नम्बरको टेलर ठोक्किँदा टेम्पु चालक धनकुटा २ का २५ बर्षीय दशरथ पाख्रीन र टेम्पुमा सवार तेह्रथुम छ थर गाउँपालिका १ का ४२ बर्षीय साङ्गे शेर्पाको घट्ना स्थलमा नै मृत्यु भएको थियो । दुर्घटनामा घाईते भएका टेम्पुमा सवार छ थर जोरपाटी ५ का २२ बर्षीय रविन घिमिरे र तेह्रथुमको लालिगुँरास ५ का २५ बर्षीय प्रदिप बस्नेतको उपचार भईरहेको छ ।
घटनापछि आक्रोसित मृतकका आफन्त र स्थानीयबासीले दुर्घटनास्थलमा शव तेस्राएर दिनभर प्रदर्शन गर्दा सडक अवरोध भएको थियो । दिनभर सवारी आवतजावत हुँन नसक्दा सयौं सवारी सडकमै रोकिदा यात्रुको बिचल्ली भएको थियो ।
घटनापश्चात प्रशासनको पहलमा मृतकका आफन्त र ट्रेलर साहु पक्षवीच अपरान्ह छलफल भएको थियो । जिल्ला प्रहरी कार्यालयमा भएको करिव दुई घण्टा लामो छलफलमा दुई पक्षवीच सहमति जुटेपछि साँझबाट सवारी सुचारु भएको हो ।
डोजर बोक्न प्रयोग गरिने टेलर र चालक प्रहरी नियन्त्रणमा छन् ।