गोरखा समाचारदाता
सुनसरी – सुनसरीको इटहरीस्थित सुर्य कम्प्लेक्समा रहेको बिग वार रेष्टुरेन्टमा गए राति भीषण आगलागी भएको छ । व्यापारिक कम्प्लेक्सको चौथो तलामा रहेको रेष्टुरेन्टमा रातको साढे १२ बजे अकस्मात आगलागी हुँदा रेष्टुरेन्ट पुर्ण रूपमा जलेर ध्वस्त भएको छ । आगलागी बाट २ करोड ५० लाख भन्दा बढीको क्षति भएको अनुमान गरीएको छ ।
मध्यरातमा भएको आगलागी नियन्त्रणका लागि सुनसरी, मोरङ्ग, झापा र सप्तरीका विभिन्न स्थानबाट आएका ९ वटा वारूणयन्त्र परिचालित भएका थिए । उक्त रेष्टुरेन्ट किरण बुढाथोकीको भएको सुनसरी प्रहरीले जानकारी दिएको छ ।
आगलागी नेपाली सेना, प्रहरी, सशस्त्र प्रहरी, ट्राफिक प्रहरी, अग्नि नियन्त्रक टोलिका साथै स्थानीय बासिन्दाको सक्रियतामा झण्डै चार घण्टापछि नियन्त्रणमा आएको थियो ।
सो व्यापारिक कम्प्लेक्सका अन्य तलाहरूमा ग्लोवल आईएमई बैंक लगायत अन्य वित्तीय संस्थाका साथै एक दर्जनभन्दा बढि व्यवसायिक फर्महरू रहेका छन् ।
