नरेन्द्र ढकाल
गोरखा – पालुङ्टार नगरपालिकाले बिना ब्याजमा ऋण दिने भएको छ । कृषि, साना तथा घरेलु उद्योग र व्यवसाय गर्न चाहने युवालाई उक्त कर्जा प्रवाह गर्न लागिएको पालुङ्टार नगरपालिकाले जनाएको छ ।
‘मैले चुनाव अघि घोषणापत्र मै किसान क्लव बनाएर सहुलियतमा ऋण उपलब्ध गराउँछु भनेको थिए,’ नगरप्रमुख दिपकबाबु कंडेलले भने ‘अहिले उक्त कुरा साकार भएको छ, निश्चय नै यसले पहिलो प्राथमिकता किसानलाई नै दिन्छ, त्यसपछि परम्परागत व्यवसाय गर्दै आउनु भएका शिल्पी समूदायलाई व्यवसायीक बनाउनु पनि यो कार्यक्रमको अर्को उदेश्य हो ।’ त्यसको अलवा घरेलु तथा साना उद्योग सञ्चालन गर्न चाहने व्यक्ति एवं समूहलाई समेत सो कर्जा प्रवाह गरिने पालुङ्टार नगरपालिकाले स्पष्ट पारेको छ । ‘जो व्यवसाय गर्न चाहने विपन्न, दलित, महिला हुनुहुन्छ उहाँहरुलाई रकम दिन्छौं’ उनले भने ‘गरिब नागरिक आयस्तर उकास्नु यो कार्यक्रमको मुख्य उदेश्य हो ।’
नगरबासीलाई सहुलियतको ऋण दिनका लागि भन्दै पालुङ्टार नगरपालिकाले चालु आर्थिक वर्षमा १ करोड ३५ लाख रकम विनियोजन गरेको छ । छनोटमा परेका व्यक्ति एवं समूहले ३ वर्ष भित्र किस्ताबन्दी रुपमा आफूले बुझेको रकम फिर्ता गर्नुपर्ने कार्यविधि बनाइएको छ । ‘लगानी र व्यवसायको प्रकृति हेरेर कम्तिमा ६ महिना देखि ३ वर्षसम्म रकम फिर्ता गर्नुपर्ने नियम बनाइएको छ’ नगरप्रमुख कंडेलले भने ‘यो कार्यक्रमले मिटर व्याजमा सर्वसाधरण ठग्ने र लघुवित्तका नाममा हुने ठगी पनि कम गर्न सकिन्छ भन्ने नगरपालिकाको अपेक्षा छ ।’
उक्त नगरपाकिलाका भित्रका कृषक र घरेलु तथा साना उद्योग गर्न चाहने व्यक्ति एवं समूहलाई वडा कार्यालयको सिफारिसमा सहुलियतपूर्ण कर्जा प्रवाह गर्न लागिएको छ । यो कार्यक्रमले नागरिकमा स्वआर्जनको भावना बिकास गराउनुका साथै आर्थिक अभावका कारण व्यवसाय गर्न नसकेकाहरुलाई मद्दत पुग्ने अपेक्षा लिइएको छ । ‘पैसा नभएर काम गर्न नपाएका र चर्को व्याजमा ऋण लिएर आजित भएका दुबैलाई यो कार्यक्रमले मुक्ति दिन्छ’ उनले भने ‘लक्ष्य अनुसार काम भयो भने यसले पक्कै पालुङ्टारको समृद्धिमा टेवा पु¥याउछ ।’
यसले विदेशिने युवाहरुको संख्यामा कमि ल्याउनुका साथै पालुङ्टारको आर्थिक समृद्धीमा पनि टेवा पुग्ने नगपालिकाको दाबी छ ।