- मनास्लु संरक्षण क्षेत्र आयोजना कार्यालयले ९ लाख रुपैयाँ क्षतिपुर्ती तिरयाे
गोरखा समाचारदाता
गोरखा – गोरखा जिल्लाको विभिन्न क्षेत्रमा घरपालुवा पशु चौपायालाई चितुवाले शिकार गरे पछि मनास्लु संरक्षण क्षेत्र आयोजना कार्यालयले ९ लाख रुपैयाँ क्षतिपुर्ती तिरेको छ ।
गोरखा सदरमुकाममा रहेको आयोजनाको कार्यालयले दिएको जानकारी अनुसार जिल्ला भित्र आर्थिक वर्ष ०७५/०७६ मा ८३ घरपालुवा पशु चौपायालाई चितुवाले शिकार गर्दा ९ लाख २३ हजार १ सय रुपैयाँ पशुधनीलाई क्षतिपुर्ती बापत रकम भूक्तानी गरीएको हो ।
आयोजना प्रमुख नरेन्द्र लामाका अनुसार घरपालुवा पशु चौपायालाई बाघ, हात्ति, गैडा, भालु, चितुवा, हिउँ चितुवा, जंगली कुकुर, जंगली बदेल, अर्ना, मगर गोही, अजिङ्गर, ध्वासे चितुवा र ब्वासोले क्षति पुरयाएमा त्यस बापत क्षतिपुर्ती पाउने ब्यवस्था नेपाल सरकारले गरेको छ ।
क्षतिपुर्ती दिनु अगाडी पिडित घरपरिवारले डिभिजन बन कार्यालय वा आयोजनाको कार्यालयमा निवेदन दिए पछि मुल्यांकनको आधारमा क्षतिपुर्ती दिने गरेको आयोजना प्रमुख लामाले बताए ।
जस अन्तरर्गत रहेर गोरखाको विभिन्न क्षेत्रमा चितुवाले घरपालुवा पशु चौपायालाई गरेको क्षतिको आधारमा आयोजनाले क्षतिपुर्ती दिएको हो । आयोजनाका अनुसार खसीबोकाको हकमा बढीमा १० हजार रुपैयाँ सम्म दिन सकिने भएता पनि गाई, गोरु, साँढे र भैसीको हकमा बढीमा ३० हजार सम्म क्षतिपुर्ती दिन सक्ने ब्यवस्था गरिएको छ ।
आयोजनाले उपलब्ध गराएको रेकर्ड अनुसार गोरखा नगरपालिका १८, भिमसेन थापा गाउँपालिकामा २३ वटा, बारपाक सुलिकोट गाउँपालिकामा ३, पालुङटार नगरपालिकामा ६ वटा र शहिदलखन गाउँपालिकामा ८ वटा घरपालुवा पशु चौपायालाई चितुवाले शिकार गरेको देखिन्छ । अन्य गाउँपालिकामा पनि चितुवाले घरपालुवा जनावरको शिकार गरेको आयोजनाले जानकारी दिएको छ ।
