गोरखा समाचारदाता
गोरखा – उत्तरी गोरखामा रहेको मनास्लु पदमार्गमा जाने स्वदेशी तथा विदेशी पर्यटकले गोरखा बजारको बाटो भएर जानुपर्ने गोरखा उद्योग बाणिज्य संघले माग राखेको छ ।
संघले संस्कृती तथा पर्यटन मन्त्रालय, गृह मन्त्रालय र जिल्ला प्रशासन कार्यालय गोरखालाई ध्यानाकर्ष पत्र दिदै विगतमा जस्तै मनास्लु पदमार्ग जाने जो कोहीले पनि गोरखा बजारको बाटो प्रयोग गनुपर्ने माग गरेको हो ।
बिगतमा गोरखा बजार हुदै आरुघाट भएर मात्र मनास्लु पदमार्ग जाने गरीएकोमा केही बर्ष देखी फाइदाका लागि ट्रेकिङ एजेन्सीहरुले धादिङको बाटो हुदै आरुघाट बजार भएर मनास्लु पदमार्ग लाने गरेको छ ।
ऐतिहासिक तथा पुरातात्वीक हिसाबको गोरखा सदरमुकाममा पर्यटकलाई प्रवेश नगराई सिधै आरुघाट बजार हुदै उत्तरी गोरखा लैजादा पर्यटकले गोरखाको ईतिहास बुझन नपाएको संघको ठहर रहेको छ ।
उत्तरी गोरखामा रहेको विश्व प्रसिद्व मनास्लु हिमाल, अहिंसा क्षेत्र चुम उपत्यकाका साथै लार्के पास, श्रृङ्गी हिमाल, पुरातात्वीक गुम्बाहरु अबलोकन गर्न आउनेहरुले लार्के पास हुदै मनाङ पुगेर लमजुङको बाटो प्रयोग गरेर राजधानी फर्कदा गोरखाको ऐतिहासीक धरोहरका साथै ईतिहास बुझन कठिन भएको गोरखाको ईतिहासमा चासो राख्नेहरुको बुझाई रहेको छ ।
उत्तरी गोरखाको मनास्लु पदमार्गमा जानेहरुले प्राकृतिक झरना, ताल, गुम्बा, हिमाल आरोहण, बन्यजन्तुका साथै स्थानिय संस्कृतीको अबलोकन गर्ने गर्दछन ।
