मोहसिन अलि मिया
गाेरखा – जिल्लामा झण्डै साडे सात हजार भूकम्प पिडितले दोेस्रो किस्ता लिएका छैनन् ।
पहिलो किस्ता बुझेर घर नबनाएका ७ हजार ४ सय २६ लाभग्राहीले दोस्रो किस्ता लिन बाँकी रहेको जिल्ला आयोजना कार्यान्वयन इकाईको तथ्यांकमा उल्लेख छ ।
भूकम्प गएको झण्डै ५२ महिना बितिसक्दा समेत पहिलो किस्ता लिएर बसेका सो संख्याका लाभग्राहीले घर बनाउन आनाकानी गरेका हुन् ।
५ हजार ३ सय ५३ प्रवलीकरणका सहित ७१ हजार १ सय ६२ लाभग्राही रहेको गोरखामा हालसम्म ६७ हजार ८७ जनाले पहिलो किस्ता बुझेका छन् भने ५९ हजार ६ सय ६१ जनाले मात्रै दोस्रो किस्ता लिएका हुन् ।
‘पहिलो किस्ता लिएर पनि घर नबनाउनेलाई हामीले बारम्बार ताकेता गरिरहेका छौ’ इकाईका जिल्ला प्रमुख रामशरण आचार्यले भने ‘केहि भरखरै पहिलो किस्ता लिने छन् भने केहि चाहि पूरानै पनि हुनुहुन्छ ।’
यसरी पहिलो किस्ता लिएर घर नबनाउनेमा सबैभन्दा बढी पालुङ्टार नगरपालिकाका लाभग्राही छन् । जहाँ १ हजार ५ सय ६० जनाले दोस्रो किस्ता नै लिएका छैनन् ।
त्यस्तै गोरखा नगरपालिकामा १ हजार ४ सय ४४ छन् भने शहिद लखन गाउँपालिकामा १ हजार १ सय ११ जनाले पहिलो किस्ता लिएर पनि घर नबनाउदा दोस्रो किस्ता पाउन सकेका छैनन् ।
त्यस्तै गरी सिरानचोकमा ८ सय ६२, गण्डकी गाउँपालिकामा ५ सय २७ ले दोस्रो किस्ता लिन बाँकी देखिन्छ ।
इकाईमा प्राप्त तथ्यांक अनुसार धार्चेमा ४ सय ७, चुमनुब्री र आरुघाटमा बराबर ३ सय ५८, भिमसेन थापा गाउँपालिकामा ३ सय ३६, सुलिकोटमा २ सय ९७र सबैभन्दा कम अजिरकोटमा १ सय ६६ जनाले दोस्रो किस्ता लिन बाँकी रहेकोे देखिन्छ ।
यो संख्यामा प्रवलीकरणमा रहेकाहरुले लिएको पहिलो किस्ताको संख्या समेत राखिएको छ । तर सो संख्या अत्यन्त न्यून रहेको इकाईले जनाएको छ ।
यसरी पहिलो किस्ता लिएर पनि घर नबनाएकाहरुलाई घर पुर्ननिर्माणको काम सुरु गर्न राष्ट्रिय पुर्ननिर्माण प्राधिकरणले सूचना निकालेको छ ।
‘कि घर बनाएर दोस्रो किस्ताको प्रकृयामा आउनुप¥यो हैन भने पहिलो किस्ता फिर्ता गर्नुपरयो’ इकाईका प्रमुख आचार्यले भने ‘अब उहाँहरुलाई प्राधिकरणले कार्तिक मसान्तसम्मको समयसिमा दिएको छ, त्यसमा पनि अटेरी गरे प्राधिकरणले कारबाहीको प्रकृया अघि बढाउला ।’ इकाईले सम्बन्धित स्थानीय पालिका मार्फत ताकेता गरिरहेको जनाएको छ ।
घर पूर्ननिर्माण सम्पन्न गरी जिल्लामा हालसम्म ५३ हजार ९ सय १३ जनाले तेस्रो किस्ता बुझेका छन् भने ३१ जनाले घर नबनाउने भन्दै पहिलो किस्ता फिर्ता गरेको इकाई प्रमुख आचार्यले बताए ।
यता प्राधिकरणले तोकेको असार मसान्तसम्मको समयसिमा भित्र समेत अनुदान सम्झौता नगर्ने र पहिलो किस्ता नलिएका ४ हजार ३ सय ३१ भूकम्पपिडितको नाम लाभग्राहीबाट हट्ने भएको छ ।