मोहसिन अलिमिया
गाेरखा – सदरमुकाममा रहेको एक मात्र सरकारी अस्पताल दुई महिनादेखि प्रमुख बिहिन छ ।
५५ शैया भनिएको गोरखा अस्पतालमा यसअघिका मेडिकल सुपरिटेण्डेन डा. श्रीराम तिवारी भरतपुर अस्पतालमा सरुवा भए यता गण्डकी प्रदेश सरकारले प्रमुख नखटाउदा अस्पतालको ब्यवस्थापन भद्रगोल बनेको छ ।
आश्चार्य लाग्दो कुरा त के छ भने अहिले अस्पताल करारमा रहेका डाक्टरकै भरमा चलेको छ । अस्पतालमा कार्यरत स्थायी डाक्टरहरुको एकपछि अर्को गर्दै अन्यत्र जिल्ला सरुवा भएपछि हाल गोरखा अस्पताल करारका डाक्टरले धान्नुपर्ने बाध्यता बनेको हो ।
‘अस्पतालमा समस्याका चाँङै चाँङ छन्’ हाल प्रमुखको निमित्तमा रहेका डा. सफलनाथ सुवेदीले भने ‘ब्यवस्थापकियदेखि आर्थिकसम्म सबैजसो प्रमुखकै भरमा हुन्छन्, यै बेला बिल्डिङ भत्किएको छ, स्थायी डाक्टर पनि छैनन्, हामी सबै करारका हौ, धेरै अधिकार पनि नहुने, तर सेवा चाहि दिनुपर्ने, साह्रै समस्या भो ।’
तत्कालिन प्रमुख तिवारीले स्थायी मेडिकल अधिकृत सिलु अर्याललाई निमित्त दिएर गएका थिए । तर अर्याल समेत समायोजनका कारण म्याग्दी जिल्ला अस्पतालमा सरुवा भएर गएपछि करारमा रहेका सुवेदीले निमित्तको जिम्मेवारी सम्हालेका छन् ।
गण्डकी प्रदेश सरकार अन्तरगत रहेको सामाजिक विकास मन्त्रालयले प्रमुख खटाउन ढिलाई गर्दा अहिले अस्पतालमा औषधी र अन्य अत्यावस्यक सामग्रीको समेत अभाव हुन थालेको स्रोत बताउछ ।
त्यसो त दरबन्दी अनुसार कर्मचारी नहुदा सधै समस्याको भुमरीमा फस्दै आएको जिल्ला अस्पतालमा हाल भएका पनि अन्यत्र सरुवा हुदा सेवा झनै खस्किएको छ । ‘स्टाफ धेरै कम छन्, भएका पनि धेरै गएसकेका छन्,’ निमित्त प्रमुख सुवेदीले भने ‘लथालिङ्गको अवस्थाबाट गुज्रनु बाहेक अरु विकल्प छैन ।’
यता अस्पताल विकास समिति पनि प्रमुख नहुदा सेवा प्रभावित बनेको स्विकार्छ । समितिका तर्फबाट पटक पटक प्रदेश सरकार र मन्त्रालयमा अनुरोध गर्दा समेत सुनुवाई नभएको अध्यक्ष पुरुषोत्तम अर्यालले गुनासो गरे ।
‘हामीकहाँ भएका डाक्टर चाहि तुरुन्त अन्त पठाइहाल भन्ने अनि यहाँ चाहि पठाउन नपर्ने यो कस्तो नियम हो’ अर्यालले दुखेसो गरे ‘पटक पटक मन्त्री, साँसदलाई भन्यौ, यत्रो महिना भइसक्यो, हुन्छ हुन्छ मात्रै भन्छन् ।’
केहि समययता गोरखा अस्पतालको प्रमुखमा डा. गुणराज लोहनी नै आउने चर्चा चलेपनि हिजो मात्रै उनले कोशी अञ्चल अस्पतालमा प्रमुखको पदभार सम्हालिसकेका छन् । उनि यस अघि समेत यहाँ प्रमुख भएर काम गरिसकेका थिए ।
हाल जिल्ला अस्पतालको भवन निर्माणका क्रममा रहेकाले त्यसै त भद्रगोल अवस्थामा रहेको बेला महिनौदेखि प्रमुख विहिन बन्दा सेवाग्राही महंगो शुल्क तिरेर नीजि अस्पताल र मेडिकल धाउन बाध्य छन् ।
पूरानो सबै भवन भत्काएर झण्डै ३० करोडको लगानीमा सुविधासम्पन्न भवन बन्ने क्रममा रहेको जिल्ला अस्पतालमा हाल चिकित्सक बस्ने आवास र घर भाडामा लिएर सेवा दिनुपर्ने बाध्यता छ ।
त्यस्तै अस्पतालमा रहेका एक्स्रे, भिडियो एक्स्रे समेत गुणस्तरिय नहुदा सेवाग्राहीले सास्ती भोग्दै आएका छन् ।
गत शनिबार जिल्ला आएका संघिय सरकारका स्वास्थ्य मन्त्री उपेन्द्र यादव र गण्डकी प्रदेशका मुख्यमन्त्री पृथ्वीसुब्बा गुरुङले गोरखा अस्पतालमा चाडै डाक्टर खटाउने आश्वासन दिएका थिए । समायोजनका कारण केहि समस्या भएको उनिहरुको तर्क थियो ।