गाेरखा समाचारदाता
गाेरखा – जिल्ला सदरमुकाममा विपीचोकमा ‘मल्टिपर्पोज बिल्डिङ’ निर्माण हुने भएको छ ।
नगर विकास कोषबाट ५ करोड ४६ लाख ९२ हजार रुपैयाँ ऋण लिएर गोरखा नगरपालिकाले उक्त बहुउद्धेश्यीय भवन निर्माण गर्न लागेको हो । ‘हामीलाई एउटा बहुउदेश्य भवन आवश्यक परिरहेको छ’ नगरप्रमुख राजनराज पन्तले भने ‘बिपी चोक मुनि खेर गइरहेको जमिन सदुपयोग गरेर यो बिल्डिङ बनाउन लगाएका हौं ।’
आइतबार गोरखा नगरपालिका र नगर विकास कोष बीच ‘बहुउद्धेश्यीय बिल्डिङ’ निर्माण गर्ने विषयमा सम्झौता भएको छ ।
गोरखा नगरपालिका ६ र ७ को सिमानामा रहेको विपी चोक मुनिको खोस्लालाई व्यवस्थित गरी भवन निर्माण गर्न लागिएको हो । ‘यो बिल्डिङमा हामी पसल कबल सञ्चालन गछौं, त्यसले नगरपालिाकाको आन्तरिक आय बढ्छ’ उनले भने ‘भवनसँँगै बाटो पनि निर्माण हुने हुँदा यसले पैदलयात्रीलाई समेत सजिलो हुन्छ ।’
अहिले फोहोर फाल्ने ठाउँको रुपमा परिणत भइरहको उक्त खाली जमिनलाई सदुपयोग गरेर बिल्डिङ बनाउँदा सहरी सुन्दरता वृद्धी समेत हुने नगरपालिकाले विश्वास लिएको छ । आइतबार मेयर पन्त र नगर विकास कोषका कार्यकारी निर्देशक मनिराम सिंह महतले सम्झौतापत्रमा हस्ताक्षर गरेका हुन् ।
बिल्डिङ निर्माणका लागि नगरपालिकाले वार्षिक ५.५ प्रतिशत ब्याजदरमा ऋण लिएको हो । उक्त ऋण २० वर्षभित्र चुक्ता गरिसक्नु पर्नेछ । ‘खोल्सी व्यवस्थापन गरी त्यहाँ सटर निर्माण गर्छौं,’ उनले भने ‘त्यसलाई भाडा लगाएर आउने आम्दानीबात ऋण तिर्दै जाने हो ।’
केही दिन भित्र बोलपत्र आब्हान गर्ने गोरखा नगरपालिकाले तयारी गरेको छ । निर्माण सुरु भएको एक वर्ष भित्र काम सम्पन्न गर्ने लक्ष्य लिइएको छ ।