नरेन्द्र ढकाल
गाेरखा – जिल्लाको ग्रामिण भेग प्रवेश गर्ने मुख्य नाका बाह्र किलो-छेवेटार सडक खण्डको कामबीचैमाअलपत्रहुँदा सवारी सञ्चालनमा समस्या भएको छ ।
यस अघि नै कालोपत्रे भएको उक्त सडक पुर्ण रुपमा भत्किए पछि केही समय अघि मर्मत सुरु गरिएको थियो । अहिले मर्मतको काम रोकिएको छ ।
नाली निर्माण र केही ठाउँमा पर्खाल लगाउने काम बाहेक अरु केही काम नभएको स्थानीयले बताएका छन् । ‘असारमा केही दिन काम भएको थियो, त्यसपछि हामीले काम गर्ने मान्छे देखेको छैन बाह्र किलोका एक व्यापारीले भने ‘पैसा लिनलाई असार मसान्तमा काम गरेको होला ।
अफिसले पैसा दिइ हाल्यो होला अब किन गर्थेे ? गोरखा– बारपाक सडकको पहिलो खण्ड अन्र्तगत बाह्र किलोबाट मसाने ठाँटीसम्मको ४ किलोमिटर सडक मर्मतका लागि गतवर्ष १ करोड ७७ लाख बजेट विनियोजन भएको थियो ।
गोरखा एप्राेप्रियट रि कन्स्ट्रक्सनले निर्माण जिम्मा लिएको उक्त सडक केही दिन आवतजावत रोक लगाएर निर्माण गरिएको थियो ।
नयाँ आर्थिक वर्ष सुरु भएपछि अहिले काम ठप्प छ । ‘नाली र वाल लगाउने काम भएको देखिन्छ । तर वाल लगाइएको ठाउँमा माटो समेत हालि दिएको छैन’ पूर्व सभासद समेत रहेका स्थानीय ज्ञानेन्द्र कुमालले भने ‘यो गम्भिर लार्पवाहीहो कम्तीमा माटो मात्र हालिदिएको भए धेरै सजिलो हुन्थ्यो । गतवर्ष पनि त्यहाँ दुई वटा ट्रक पल्टिसकेको छ ।’
२०६६ सालमा कालोपत्रे भएको उक्त सडक पूर्ण रुपमा भत्किएपछि २०७६ कात्र्तिकसम्म मर्मत गर्ने गरी गोरखा एप्राेप्रियट रि कन्स्ट्रक्सनलाई ठेक्का दिइएको छ ।
समय सिमा बाँकी रहे पनि सडक भत्काएर छोडिएकाले यातायात सञ्चालनमा समस्या भएको हो । ‘कार्तिक सम्मको समय सिमा छ । अहिल्यै काम गरेन भन्न मिलेन’ ११ किलो-छेवेटार-भालुस्वाँरा-बारपाक सडक आयोजनाका इन्जिनिर राजेशकुमार यादवले भने ‘वर्खाले काम हुन नसकेको हो । पानी पनि कमहुँदै गएको छ, अब छिट्टै काम सुरु हुन्छ ।’
सोका लागिआवश्यक यन्त्र उपकरण कार्य स्थलमा लैजाने काम सुरु भएको उनले दाबी गरे । ‘२७ सय मिटर सडक भत्काएर पुनःपिचगर्ने र २ सय मिटर ढलान गर्नुपर्ने अवस्था छ’ उनले भने ‘समय सिमा भित्रकाम सम्पन्न गराउन हामी लागि परेका छौं ।’
जिल्लाको क्षेत्र नम्बर २ प्रवेशको प्रमुखद्धार मानिएको बाह्रकिलो-छेवेटार सडकमा निर्माण ढिलाई हुँदा दैनिक दजनौं सवारी साधन मारमा परेका छन् । नयाँ नाली खन्ने क्रममा निकालिएको माटोले सडक हिलाम्मे हुनुका साथै ठाउँ-ठाउँमा ठुला खाडल परेका छन् । जसले गर्दा सवारी सञ्चालनमा समस्या भएको छ । ‘यस पटक सडक खुल्ला राखेर नै काम गर्ने हाम्रो योजना छ’ उनले भने ‘भत्किएर नै बनाउन लागिएको हो कहीँ त्यस्तो समस्या भएर गाडी चल्न गाह्रो भएको छ भने हामी हेरेर त्यसलाई पनि तत्काल बनाउन लगाउँछौं ।’
१२ किलो हुँदै बारपाक, भच्चेक, पालुङ्टार लगायतका क्षेत्रमा सवारी सञ्चालन हुँदै आएको छ । कुल ४६ किलोमिटर लम्बाईको गोरखा बारपाक सडकको छेपेटार खण्ड बाहेक अन्यको समय सिमा समेत सकिएको छ । ५ खण्ड मध्ये एउटाको ठेक्का समेत रद्द भएको छ । अन्यलाई जरिवाना तिराएर म्याद थप गरी काम लगाउने कार्यालयको तयारी छ ।