नरेन्द्र ढकाल/गोरखा
पुस १० गते । भुकम्पले दिएको पिडालाई अबसरमा परिणत गर्ने प्रयास सुरु भएको छ । बिनाशकारी भुकम्पले घरवार बिहिन भएकाहरुको चोटमा मलहम लगाउन सरकारी र गैरसरकारी सस्थाहरु मार्फत अनगिन्ती काम भइरहेका छन् । ‘अहिले त आँगनमा पानी आएको छ, तसलामा थापेर भात पकाउँछु’ अजिरकोट गाउँपालिका वडा नम्बर ४ सिम्जुङको बाँजागाउँकी उदिमायाँ गुरुङले भनिन् । घर देखि झण्डै डेढ घण्टाको पैदल दुरीमा जङ्गल विचमा रहेको धाराबाट पानी बोकेर गुजारा गर्दै आएका थिए ।
नेपाल सरकारको एक घर एक धारा निति अनुसार आगँन मै पानीको धारा बनेपछि अहिले उनीहरु दङ्ग छन् । ‘राती नै पालो छोप्न जानुपथ्र्यो, बल्लबल्ल एक गाग्रो पानी ल्यायो, खानेकी, खाना बनाउने की, बस्तुलाइ खुवाउने, अहिले यति सजिलो भएको छ’ अस्थायी टहरो नजिकै बनेको धारामा पानी थाप्दै गरेकी सन्सरी गुरुङले खुसि हुँदै भनिन् । खानेपानीको हाहाकार रहेको बाँजागाउँमा जिल्ला खानेपानी तथा सरसफाई डिजिभन कार्यालयको समन्वय अक्सफाम र एकिकरण नेपालको साझेदारीमा बाँजागाउँ खानेपानी आयोजना निर्माण भएपछि स्थानीयको मुहारमा खुसि छाएको हो ।
सिम्जुङको बाँजगाउँ,गोगनपानी र ताप्ले खानेपानी आयोजना निर्माण भएसँगै खानेपानीको सुबिधा हुनुका साथै पुननिर्माणको काममा पनि सहज भएको स्थानीय कालु गुरुङले बताए । क्रमश बाँजागाउँ, गोगनपानी र ताप्लेमा २१ लाख ८९ हजार,२४ लाख ४८ हजार, ११ लाख ८९ हजार लागतमा खानेपानी आयोजना निर्माण गरिएको एकिकरण नेपालका जिल्ला कार्यक्रम संयोजक तुलसीराज धितालले जानकारी दिए ।
‘हाम्रो तर्फबाट यति रकम उपलब्ध गराएपनि उहाँहरुले पाइपलाईन खन्ने अन्य थुप्रै काममा श्रमदान गनुभएको छ’ उनले भने । उक्त आयोजनाको पाइपलाइन निर्माणको काम तिन योजना गरी १५ लाख भन्दा बढिको जनश्रमदान छ । सिम्जुङका तिन गाउँमा मात्र १५९ वटा घरमा एक घर एक धारा कार्याक्रम अनुसार घरघरमा पानी पुरयाइएको छ ।
यता अक्सफाम र गोरेटो गोरखाको साझदारी र जिल्ला खानेपानी तथा सरसफाई डिभिजनको समन्वयमा सुलिकोट गाउँपालिका वडा नम्बर ४ सौरपानीमा ढापेखोला खानेपानी आयोजना बनेपछि त्यहाँका स्थानियलाई पनि निकै सहज भएको छ । गाउँभन्दा झण्डै १ घण्टा टाढा जंगलबाट खानेपानी ल्याएर उपभोग गर्दै आएकाहरु अब घर बनाउन समेत सहज हुने भन्दै खुसि लागेको स्थानीय धनीमायाँ पनेरु बताईन् । ‘अब त घर पानी आएको छ, यसलाई सदुपयोग गरेर करेसाबारीमा तरकारी लगाउँछौं, पानी बोकेर खेर गएको समय अरु क्षेत्रमा खर्च गर्न पाइने भयो, निकै खुसी लागेको छ’ पनेरुले भनिन् ।
कुल २२ लाख ६७ हजार लागतमा बनेको उक्त खानेपानी निर्माण कार्यममा ८ लाख ८६ हजार भन्दा बढिको श्रमदान गरेका छन् । भुकम्पले थला परेको उक्त गाउँ पुननिर्माणको लागि पनि मद्दत पुग्ने स्थानीयको विश्वास छ । ‘अब त घर बनाउन पनि सहज हुने भयो, पानी आँगन मै छ’ पनेरुले भनिन् । त्यहाँ ४८ घरमा धारा जडान गरी पानी समेत आइसकेको छ ।
उक्त सबै आयोजनाको शुक्रबार र शनिवार जिल्लाका सरोकारवालाहरुले संयुक्त अनुगमन गरी उद्घाटन समेत गरेका छन् । जिल्ला संमन्वय समितिका प्रमुख अशोककुमार गुरुङ, सदस्य इन्द्रा गुरुङ, जिल्ला खानेपानी तथा सरसफाई कार्यालयका प्रमुख रत्न लामिछाने, अक्सफामका जिल्ला कार्यक्रम संयोजक बिजयराज पन्त, गोरेटो गोरखाका कार्यकारी निर्देशक पवनरमण खनाल, एकिकरण नेपालका कार्यकारी निर्देशक हरी देवकोटा, गोरेटो गोरखाकी कोसाध्यक्ष सम्झना ढकाल, एकिरण नेपालकी सचिव दुर्गा गुरुङ, सुलिकोट गाउँपालिकाका प्रमुख विष्णु भट्ट, वडा नम्बर ४ का अध्यक्ष भिम बहादुर गुरुङ, अजिरकोट गाउँपालिका वडा नम्बर ४ का अध्यक्ष जङ्ग बहादुर गुरुङ, गोरेटो गोरखाका जिल्ला कार्यक्रम संयोजक पुरुषोतम ढकाल, एकिकरण नेपालका जिल्ला कार्यक्रम संयोजक तुलसीराज धिताल लगायतले खानेपानी आयोजना दिगोपनामा जोड दिदै मन्तव्य राखेका थिए ।
