गोरखा समाचारदाता
मंसिर १५ गते । बुढीगण्डकी डुबान क्षेत्रका प्रभावितका लागि मुआब्जा वितरण गर्न निवेदन माग गरिएको छ । यस आर्थिक वर्षमा वितरण गर्ने मुआब्जा रकम प्रक्रिया सुरु भएको बुढीगण्डकी आयोजना इकाई कार्यालयका प्रमुख कृष्ण कार्कीले बताए । ‘हामीले गोरखा पत्रमा सुचना प्रकाशन गरी निवेदन माग गरेको थियौ, सोही अनुसार निवेदन संकलनको काम सुरु भएको छ’ उनले भने । मुआब्जा निर्धारण भएका गोरखा र धादिङको दुबै तिरको मुआब्जा वितरणको लागि आयोजनाले सुचना प्रकाशन गरिसकेको छ ।
सोही अनुरुप साविकको फुजेल गाविसबाट बिहीबार देखि डुबानमा पर्ने जग्गाको निवेदन संकलन गरिएको हो । मुआब्जा वितरणका लागि आवश्यक रकम उपलब्ध गराउने सरकारले प्रतिवद्धता व्यक्त गरिसकेको छ । १० अर्ब रकम दुबै जिल्ला प्रशासन कार्यालयमा निकास भईसकेको छ । पेट्रोलिम पदार्थको कर बाट झण्डै १४ अर्ब रकम संकलन भएको छ ।
चिनियाँ जेगुवा कम्पनी सँगको सम्झौता खारेज गरेको सरकारले अयोजना निर्माणको काम स्वदेशी लगानीमा नै गर्ने बताउँदै आएको छ । यस अघि गोरखा र धादिङका ३÷३ गाबिसका प्रभावितहरुलाई करिब ५ अर्ब रकम वितरण गरिएको छ । गोरखाको आरुघाट आरखेत, धादिङको बिशालटार र खहरेको मुआब्जा अझै निर्धारण हुन सकेको छैन भने फलफुल बोट विरुवा र भौतिक संरचनाको मुआब्जा पनि तोकिएको छैन् ।
प्रभावितहरुले भने एकपटक मुआब्जा वितरण गनुपर्ने, तोक्न बाँकी स्थानको मुआब्जा निर्धारण गर्नुपर्ने, पुर्नबासको ग्यारेन्टी गर्नुपर्ने लगायतका माग अगाडी सारेका छन् । मुआब्जा वितरणको काममा बुढीगण्डकी आयोजना राष्ट्रिय सरोकार समितिले असहमती जनाउँदै आन्दोलन समेत गर्दै आएको छ । यता आयोजनाले भने प्रभावित क्षेत्रका स्थानीयहरु मुआब्जा लिन उत्साहित भएको दाबी गरेको छ ।
