गोरखा समाचारदाता
कार्तिक १७ गते । संयुक्त बाम गठबन्न्धन गोरखा क्षेत्र नम्बर १ का प्रतिनिधि सभा उम्मेदवार हरिराज अधिकारीले स्थायित्वका लागि बहुमत आवश्यक रहेको बताएका छन । निर्वाचन प्रचार प्रसार एवं मतदाता भेटघाटका लागि गोरखाको धार्चे गाउँपालिका पुगेका माओवादी केन्द्रका ४ नम्बर प्रदेश संयोजक समेत रहेका अधिकारीले आसन्न निर्वाचनमा बाम गठबन्धनलाई बिजयी गराउन मतदाताहरुसँग आग्रह गरेका छन् ।
मतदाता भेटघाट कार्यक्रममा प्रदेशसभा निर्वाचन क्षेत्र नम्बर २ का उम्मेदवार रामशरण बस्नेतले बामपन्थीहरुको एकताले जनतामा उत्साह छाएको भन्दै निर्वाचनपछि नयाँ नेपालको शुरुवात हुने दाबी गरेका छन् । यता प्रतिनिधि सभा निर्वाचन क्षेत्र नम्बर १ अन्र्तगत प्रदेश सभा १ का उम्मेदवार तथा नेकपा माओबादीका नेता लेख बहादुर थापा मगर मतदाता भेटघाटका लािग दर्बुङ्ग पुगेका छन् । उम्मेदवार थापा नेतृत्वको टोलीले आजै गण्डकी गाउँपालिकाको फुजेल र दर्वुङमा वडा कार्यालय स्थापना गरेको अखिल क्रान्तिकारीका जिल्ला सचिव राजन आलेले जानकारी दिए । यता क्षेत्र नम्बर २ का प्रतिनिधि सभाका उम्मेदवार नारायणकाजी श्रेष्ठले सिरानचोक गाउँपालिका विभिन्न स्थानका मतदातासँग भेटघाट गरेको उनका सहयोगीहरुले बताएका छन् ।
उता लोकतान्त्रिक गठबन्धनका प्रतिनिधि सभा क्षेत्र नम्बर २ का उम्मेदवार बाबुराम भट्टराई र प्रदेश २ को ख का उम्मेदवार प्रकाशचन्द्र दवाडी भुकम्पको केन्द्रबिन्दु बारपाक पुगेका छन । बुधबार सिरानचोक गाउँपालिकाको जौवारीमा कार्यक्रम गरेर बारपाक पुगेका उनीहरुले त्यहाँ घर दैलो तथा चुनाबी सभा गरेर अबको आर्थिक बिकास समृद्धीका लागि लोकतान्त्रिक गठबन्धनलाई जिताउन आग्रह गरेका छन् । काँग्रेस नयाँ शक्ति बिचको तालमेल एतिहासिक भएको भन्दै नयाँशक्ति पार्टीका संयोजक समेत रहेका नेता डाक्टर भट्टराई गोरखाली जनताले आफूलाई विश्वास गर्ने बिश्वस्त रहेको दाबी गरेका छन् ।
बारपाक पुरानो ऐतिहासिक एवं बिरताले प्रसिद्ध पर्यटकिय गाउँ भएको भन्दै भुकम्पपछिको पुर्ननिर्माण तिब्रता दिएर त्यस क्षेत्रको बिकास निर्माण निर्माणमा जोड दिने प्रतिवद्धता व्यक्त गरेका छन् । पहिले काँग्रेस नेतृत्वको सरकारले काम सुरु गरेका सडकहरु शान्ति स्थापना पछि डाक्टर भट्टराई अर्थमन्त्री र प्रधानमन्त्री हुँदा कार्यन्यवन गरेपछि जिल्लाको बिकास निर्माणले गति लिएको भन्दै उक्त काम पुरा गर्नका लागि लोकतान्त्रिक गठबन्धनले जित्नुपर्ने उनीहरुको तर्क छ ।
त्यसैगरी काँग्रेस तर्फबाट गोरखा क्षेत्र नम्बर १ का उम्मेदवार चिनकाजी श्रेष्ठ,प्रदेश सभा ‘क’ का धिरन थापा र ‘ख’ का राजेन्द्र बजगाइँले पनि आफ्नो क्षेत्रमा चुनावी अभियानलाई तिब्रता दिएका छन् । बजगाइँ भिमसेन गाउँपालिकको घर दैलोमा छन् भने थापाले शहिद लखनका मतदातालाई भेटघाट गर्नुका साथै चुनावी सभालाई तिब्रता दिएको नेबिसंघका जिल्ला सदस्य मिलन सिं बस्नेतले जानकारी दिए ।
लोकतान्त्रिक गठबन्धन तर्फबाट क्षेत्र नम्बर २ को ‘क’ नयाँ शक्तिका उम्मेदवार हरिशरण आर्चाय र बाम गठबन्धकी कमला नहर्कीले घरदैलो र चुनावी प्रचार गरिरहको बताएका छन् । बिबेकशिल साझा पार्टी, देशभक्त जनतान्त्रिक मुक्ति लगायतका दलका उम्मेदवारहरु पनि आ–आफ्नो किसिमले कार्यक्रम गर्दै भोट मागिरहेका छन् ।
