मोहसिन अलि मियाँ/गोरखा
कात्तिक ११ गते । जिल्ला निर्वाचन कार्यालय गोरखाले आसन्न प्रतिनिधीसभा र प्रदेशसभाको निर्वाचनमा मतदाता शिक्षालाई प्रभावकारी रुपमा अघि बढाउने भएको छ । जस अनुसार कार्यालयले जिल्लाभर निर्वाचन शिक्षा कार्यकर्ता खटाउने तयारी गरेको छ । जिल्लाभर रहेका २ सय ८३ मतदान केन्द्रमा एक÷एक जनाको दरले कार्यकर्ता खटिदैछन् । ‘जिल्लाका सबै २ सय ८३ नै मतदान केन्द्रमा मतदाता शिक्षा स्वयम्सेवक खटाउने तयारी अन्तिम चरणमा पुगिसकेको छ, अब केही दिनमा उहाँहरुलाई जिम्मेवारी दिएर पठाउछौ’ जिल्ला निर्वाचन अधिकारी नारायण सापकोटाले भने ।
जिल्लाभर खटिने निर्वाचन शिक्षा कार्यकर्तालाई आगामी १५ र १६ गते प्रशिक्षण दिने कार्यालयले तयारी गरेको छ । प्रत्येक मतदान केन्द्रमा खटिने शिक्षा कार्यकर्ताको संख्या धेरै भएकाले ६ देखि ८ समुहमा बिभाजन गरेर कार्यालयले एक दिने प्रशिक्षण दिन लागेको जनाएको छ । ‘१५ र १६ गते उहाँहरुलाई प्रशिक्षयण गराएर, त्यै दिनबाट फिल्डमा खटाउछौ’ कार्यालयका सापकोटाले भने ।
स्थानीय तहको निर्वाचनमा पनि मतदाता शिक्षा कार्यक्रमलाई प्रभावकारी रुपमा अघि बढाइएको दाबी गरिए पनि धेरै मत बदर भएको भन्दै आलोचना भएको थियो । तर आगामी निर्वाचनमा भने सके सम्म कम मत बदर हुने गरी मतदाता शिक्षालाई अझै प्रभावकारी बनाउन लागिएको सापकोटाको भनाई छ । ‘अघिल्लो चुनावमा केही बढि नै मत बदर भएको हो, यसपाली चाहीँ त्यस्तो हुन नदिन कार्यालयले बिशेष अनुगमन गरी कडाईका साथ मतदाता शिक्षालाई अघि बढाउदै छौ’
अघिल्लो स्थानीय तहको निर्वाचनमा एउटै मतपत्रमा ७ ठाँउमा मतदान गर्नुपर्ने भएकाले पनि मतदाता भुक्किएको उनको भनाई छ । तर यो निर्वाचनमा भने दुइ वटा मतपत्र हुने र बढिमा ४ जनालाई मात्र मतदान गर्नुपर्ने भएकाले मतदातालाई अन्यौल नहुने कार्यालयका सापकोटा दावी गर्छन् ।
कार्यालयले जिल्ला समन्वय समिती अन्तरगत स्थानीय तहमा खटिएका सामाजिक परिचालकहरु, स्वास्थ्य स्वयम्सेविका तथा सामुदायिक विद्यालयका शिक्षकहरुलाई मतदाता शिक्षा स्वयम सेवकका रुपमा खटाउन लागेको छ । एक महिनाको अवधी तोकेर उनिहरुलाई कार्यक्षेत्रमा खटाइने कार्यालयको भनाई छ । कम्तिमा एसएलसी पास गरेका र ४५ बर्ष ननाघेकाहरु स्वयमसेवकमा योग्य हुने बताइएको कार्यालयका सापकोटा बताउछन् । ‘पहिलो प्राथकिता जिसस अन्तरगतका सामाजिक परिचालक, त्यसपछि महिला स्वास्थ्य स्वयम्सेबिका त्यसले पुगेन भने बिद्यालयका शिक्षकहरुलाई खटाउने तयारीमा छौ, तर कम्तिमा एसएलसी र ४५ बर्ष ननाघेको हुनुपर्छ भनेका छौ’
जिल्लामा भएका २ सय ८३ मतदान केन्द्र मध्ये सबैभन्दा कम मतदाता भएको ७१ र बढि १ हजार ६४ जना रहेका छन् । जसअनुसार एक जना शिक्षा कार्यकर्ताले कम्तिमा ७१ जनादेखि १ हजार ६४ जनासम्मलाई मतदाता शिक्षा दिनुपर्ने र प्रत्येक मतदाताको सम्पर्क नम्बर र मतदाता शिक्षा पाएको हस्ताक्षर अनिबार्य गरिएकाले यो पटक मतदाता शिक्षा निक्कै प्रभावकारी हुने कार्यालयको दावी छ ।
निर्वाचनमा सदर मत प्रतिशत बढाउन तथा बदर मत संख्या घटाउन आयोगले आमसञ्चार माध्यम मार्फत समेत मतदाता शिक्षालाई प्रशारण एवम प्रकाशन गर्ने तयारीमा रहेको जनाएको छ । बदर मत घटाउने कार्यमा स्थानीय तहका जननिर्वाचित साथै राजनीतिक दल र अन्य सरोकार पक्षलाई समेत मतदाता शिक्षामा सहयोग गर्न कार्यालयले आग्रह गरेको छ । १ लाख ८९ हजार ४ सय ४८ मतदाता भएको गोरखामा २ सय १३ मतदान स्थल र २ सय ८३ मतदान केनद्र रहेका छन् ।

लेखकबाट थप:

• लकडाउन नियम उलंघन गरेपछि सेल्टिक र एबरडीनबीचको खेल स्थगित
• पारिवारीक बनमा ठकुरी
• नेपालमै बन्छ विश्वका ७० देशलाई चाहिने आँखाको लेन्स
• सबै वडामा स्वास्थ्य चौकी बनाउने योजना
• टेष्ट वरियतामा कोहली शिर्ष स्थानमा उग्लिए