मोहसिन अलि मियाँ/गोरखा
कात्र्तिक ८ गते । उत्तरी गोरखाको लापुमा फैलिएको भाइरल नियन्त्रणमा आउन नसकेपछि जिल्लाबाट थप स्वास्थ्य टोली पठाइएको छ । केहि दिन देखि धार्चे गाँउपालिका वडा नम्बर ७ स्थित लापुमा ज्वरो, रुघाखोकीका बिरामी बढेको भन्दै टोली पठाइएको जिल्ला जनस्वास्थ्य कार्यालय गोरखाले जनाएको छ । स्थानीय स्वास्थ्यकर्मीहरुले स्थिती नियन्त्रण गर्न नसकेपछि जिल्लामा विशेषज्ञ डाक्टर सहितको थप टोली पठाएको हो ।
‘३०–४० जनामा एउटै किसिमको रोग देखा परेको भन्ने जानकारी आको छ, अहिले सम्म जिल्लाबाट टोली पुग्न नसकेकाले केका कारणले हो भन्न सकिने अबस्था छैन’ जनस्वास्थ्य कार्यालयका वरिष्ठ जनस्वास्थ्य प्रशासक केदारराज पराजुलीले भने । रुखा, खोकी, ज्वरो आउने लक्षण धेरैमा देखिएको र भाइरलबाट संक्रमित संख्या बढ्दै गइरहेकाले थप स्वास्थ्य टोली मंगलबार त्यस तर्फ पठाइएको हो । जिल्ला अस्पताल गोरखाका डाक्टर राजिव लाचनको नेतृत्वमा ल्याब सहितको ३ जनाको टोली मंगरबार साँझ लापु पुगिसेकको कार्यालयको भनाई छ । ‘डाक्टर राजिबको नेतृत्वमा ३ जना आज हिड्नु भाको छ, उहाँहरु पुगेपछि स्वास्थ्य जाँच र ल्याब टेस्टको प्रक्रिया सुरु हुन्छ’ पराजुलीले भने ।
केही दिन यता लापुमा भाइरल फैलियो भन्ने समाचार संसार माध्यम र सामाजिक सञ्जालमा ठाउँ पाएको थियो । तर उक्त कुराको भने धार्चे गाउँपालिकाका प्रमुख सन्तोष गुरुङले खण्डन गरेका छन् ।‘फेसबुक र समाचारमा आको जस्तो चाइ हैन तर केही मानिसमा एउटै प्रकारको लक्षण देखिएको छ, बिस्तारै नियन्त्रणमा ल्याउन प्रयासमा छौ’ उनले भने ।
लापुमा औषधीको कमी हुन नदिन जिल्लाबाट औषधी समेत मगाइएको गाँउपालिका प्रमुख गुरुङले जानकारी दिएका छन् । ‘मैले गाँउपालिकाले नै खर्च ब्यहोर्ने गरी औषधीको बयवस्था पनि मिलाउदै छु, वडा अध्यक्षहरु, हेल्थपोष्टका कर्मचारीलाई लापुमा खटाइसकेको छु’ उनले थपे ।
केही दिन अघि सोही लक्षण देखिएका एकजना को मृत्यु समेत भइसकेकाले गाँउमा त्रास फैलिएको छ ।यस्तै लक्षण केही समय अघि बारपाकमा समेत देखिउको थियो । एकै पटक १ सय ५० जना भन्दा बढि बिरामी परेको बारपाकमा भाइरल नियनत्रणमा आउन हप्तौ लागेको थियो । बारपाकमा देखिएको भाइरल सिजनल फ्लु एच वान एन वान भएको पुष्टी भएको थियो ।
