भारत-प्रशासित काश्मीरको उरी क्षेत्रमा सेनाको शिविरमा भएको आक्रमणमा संलग्न विद्रोहीको साथबाट पाकिस्तानी चिन्ह भएका सामाग्री भेटिएको भारतीय सेनाले बताएको छ।
सो विद्रोही हमलामा १७ जना भारतीय सैनिकको मृत्यु भएको थियो।
हमलामा संलग्न चारजना विद्रोही पनि मारिएको भारतीय सेनाले जनाएको छ।
आक्रमण लगत्तै विदेश भ्रमण स्थगित गरेका भारतीय गृहमन्त्रीले पाकिस्तानप्रति आक्रोश पोखेका छन्।
‘तालिम प्राप्त’
भारतीय सेनाका अनुसार आक्रमणमा संलग्न विद्रोहीहरुले बन्दुक र ग्रेनेडद्वारा भारतीय सैनिकमाथि जाइलागेका थिए।
भारतीय सेनाले सो आक्रमणप्रति पाकिस्तानस्थित अतिवादी समूह जैश-ए-मोहम्मद जिम्मेवार रहेको बताएको छ।
भारतीय सेनाका एक अधिकारी लेफ्टिनेन्ट जनरल रणवीर सिंहले हमलामा संलग्न विद्रोहीले आधुनिक हातहतियार बोकेका थिए र उनीहरुले विशेष प्रकृतिको तालिम लिएका थिए।
“गोली हानाहानमा मारिएका चार विद्रोहीको साथमा पाकिस्तानी सामाग्री भेटिएको छ। त्यसबारे मैले पाकिस्तानी सैन्य अधिकारीलाई गम्भीरतापूर्वक जानकारी गराएको छु।”
हालैको समयमा काश्मीरमा सैन्य फौजमाथि भएको निकै घातक पछिल्लो आक्रमण लगत्तै भारतीय गृहमन्त्री राजनाथ सिंहले रुस र अमेरिकाको भ्रमणको योजना रद्द गरेका थिए।
उनले आक्रमणपछि मारिएका विद्रोहीले विशेष तालिम लिएको पाइएको भन्दै चिन्ता व्यक्त गरे।
अस्वीकार
Image भारतीय सैन्य अधिकारीले आक्रमणमा पाकिस्तानस्थित समूहको हात रहेको बताएपनि पाकिस्तानमा कुनै समूहले आक्रमणको जिम्मेवारी लिएको छैन।
बीबीसीसँग कुरा गर्दै पाकिस्तान सरकारका एक प्रवक्ताले त्यस्तो आरोप अस्वीकार गरे।
भारत प्रशासित काश्मीरमा भारत सरकारविरोधी प्रदर्शन जारी रहँदा पछिल्लो हमला भएको हो।
ती प्रदर्शनका क्रममा विगत दुई महिनामा ८० जनाको मृत्यु भइसकेको छ।
सेनामाथि विद्रोही हमला भएपछि उरी क्षेत्रमा अन्य विद्रोहीको खोजी कार्य जारी रहेको सेनाले जनाएको छ।
BBC/nepali