अमेरिकाको न्यूयोर्कस्थित म्यानह्याटनमा विस्फोटन हुँदा २९ जना घाइते भएको अधिकारीहरुले बताएका छन्।
उक्त घटनामा घाइते भएका मध्ये कसैको पनि अवस्था चिन्ताजनक नभएको न्यूयोर्कको अग्नि नियन्त्रक विभागले जनाएको छ।
सामाजिक सञ्जालमा राखिएका तस्वीरले उक्त विस्फोटले एउटा फोहोर फाल्ने भाँडो क्षतविक्षत भएको देखाएका छन्।
क्षति
विस्फोटनले एउटा भवनको झ्याल तथा गाडीमा क्षति पुगेको बताइएको छ।
घटनाका प्रत्यक्षदर्शीले स्थानिय समय अनुसार राती ९ बजेतिर भएको उक्त विस्फोटको आवाज कानको जाली नै फुट्ने खालको ठूलो भएको बताएका छन्।
त्यति ठूलो आवाज आएपछि मानिसहरु यत्रतत्र भागेका थिए।
छेउछाउका क्षेत्रमा प्रहरीले सुरक्षा बढाएको छ।
अनुसन्धान जारी
न्यूयोर्कको प्रहरीको प्रतिआतंकवाद समूहले उक्त घटनाबारे आफुले अनुसन्धान गरिरहेको बताउँदै क्षतविक्षत भएको फोहोर फाल्ने भाँडोको तस्वीर ट्वीटरमा प्रेषित गरेका छन्।
न्यूयोर्कका मेयर बील डे ब्लाजियोले उक्त विस्फोटलाई कुनै आतंकवादी समूहसंग जोडेर हेर्नुपर्ने प्रमाण नभेटिएको बताए।
न्यूजर्सी शहरमा सेनाका अवकाशप्राप्त अधिकारीहरुको कल्याणका लागि आयोजित दौड हुन लागेको क्षेत्र नजिकै एउटा पाइप बम विस्फोट भएको केही घण्टापछि न्यूयोर्कमा उक्त विस्फोट भएको हो।
न्यूजर्सीमा भएको उक्त विस्फोटमा भने कोही पनि घाइते भएका छैनन्।
BBC/nepali
