भाद्र १३, २०७३- एक साता अघि भारतको सिमलामा हिम पहिरोमा परी ज्यान गुमाएका एकै परिवारका ६ नेपालीको ठेगाना रोल्पाको जितबाङमा भएको बताइएपछि प्रहरीले तीन दिनदेखि उनीहरुको घर खोजी गरे पनि भेटाएको भने छैन । समाचारलाई नै आधार मानेर मृतकको परिवारको व्यापक खोजी थालिएको रोल्पा प्रहरीले जनाएको छ ।

‘हामीले तीन देखि खोजी गरिरहेका छौं । तर घर र उनीहरु बारे थप जानकारी पाउन सकिएको छैन,’ जिल्ला प्रहरी प्रमुख प्रहरी नायक उपरीक्षक रामप्रसाद घर्तीमगरले भने । उनको भनाइमा अपुष्ट रुपमा प्राप्त भएको खबरमा लक्षीराम र उनकी पत्नी देवकुमारी र तीन छोरा र एउटी छोरी समेत परेको जानकारी पाए पनि थप जानकारी नपाउँदा खोजी गर्न गाह्रो भएको हो ।

भारतको हिमाचल प्रदेशको राजधानी सिमलाबाट पनि १२ घण्टा टाढा पर्ने रामपुर गाउामा उनीहरु सडक निर्माणको काममा मजदुरी गर्न पुगेका थिए । प्रहरीका अनुसार घटना भएको लामो समय भइसके पनि मृतकहरुको थप जानकारी पाउन सकिएको छैन ।

‘मिडियाले सार्वजनिक गरेको मृतकहरुको ठेगानासँग मिल्ने रोल्पामा केही गाउँहरु छन् । त्यसका आधारमा हामीले जेदबाङ, जेलबाङ र जिनाबाङ लगायतका गाउँमा उक्त घटनासँग सम्बन्धित जानकारी खोजी गरिरहेका छौं,’ प्रनाउ घर्तीमगरले भने ।

रोल्पाका प्रमुख जिल्ला अधिकारी मित्रलाल शर्माले यस घटनाबारे गहिरोसँग जानकारी प्राप्त गर्ने प्रयास गरिरहेको बताए ।

गरिबीका कारण भारतका विभिन्न स्थानमा काम खोज्न जाने रोल्पालीको संख्या ठूलो रहेको छ । भारतको हिमाचलमा लामो समय बसेर फर्केका इरिबाङका केबी थापाका अनुसार स्याउ बोक्न, तरकारी लगाउन र भारी बोक्न लगायतका कार्यमा रोल्पाका हजारौं मानिस फेला पर्छन् । ‘मजदूरी काममा धेरै रोल्पालीले काम गर्दै आएका छन्,’ थापाले भने, ‘राहदानी नचाहिने भएकाले कतिले काम गरिरहेका छन् भन्ने जानकारी पाउन मुस्किल छ । उनीहरु हजारौंको संख्यामा काम गर्छन् ।’

पश्चिमी रोल्पाका जिनाबाङ, राँक, घर्तीगाउ, ओत, तालाबाङ, जुगार, गैरीगाउँ, भाबाङ, इरिबाङ, पाछापाबाङ, दक्षिणको होलेरी क्षेत्र, पूर्वको गाम, पाङ, उवा, बडाचौर लगायतका गाउँबाट सयौं रोल्पालीहरु काम खोज्न भारत जाने गरेका छन् ।