भाद्र ८, २०७३- इटालीको मध्यक्षेत्रमा ६ दशमलव २ रेक्टर स्केलको भूकम्प जाँदा बुधबार कम्तीमा २४७ जना मारिएका छन् । उद्धारकर्ताहरूले खोजी गरिरहँदा दर्जनौ मानिस हराइरहेको सूचना प्राप्त भएको छ ।

केन्द्रविन्दु एक्युमोली वरपर धेरैजना मारिएका हुन् । उक्त क्षेत्र लगभग भग्नावेशषमा परिणत भएको छ । त्यहाँको पेस्कारा डेल ट्रोन्टो पुरै ध्वस्त छ । त्यहाँ मृतक संख्या बढ्न सक्ने अनुमान छ । स्थानीय समय बिहान साढे ३ बजे भूकम्प गएको थियो । केन्द्रविन्दु राजधानी रोमबाट सय किलोमिटर दूरीमा पर्छ ।

भूकम्प १० किमिको सानो गहिराइमा गएको हो । यसअघि सन् २००९ मा यस्तै खालको भूकम्प जाँदा ३ सय ९ जना मारिएका थए । भूकम्पको धक्का राजधानी रोममा करिब २० सेकेन्ड महसुस गरिएको थियो । मुख्य धक्कापछि लगातार ८० पटक परकम्पन गइसकेको छ ।

अधिकारीहरूले क्षति र हताहतीको खबर आउनै बाँकी रहेको बताएका छन् । अति प्रभावित अरक्वाटा डेल ट्रोन्टो गाउँका मेयर एलियान्द्रो पेट्रोसीले भने, ‘अब गाउँमा कुनै कुरा सग्ला छैनन् ।’

अधिकारीहरूका अनुसार केन्द्रविन्दु नजिकको एमाट्रिस भन्ने ठाउँमा कम्तीमा १७ जना मारिएका छन् । ‘हाम्रो गाउँका बाटाघाटा भत्किएका छन् । मानिसहरू पुरिएका छन् । लगत्तै ठूलो पहिरो गयो । एउटा पुल भाँचिन सक्छ,’ मेयर सर्गेई पिरोजीले भने । एक्युमोलीमा चार जनाको सिंगो परिवारै भग्नावशेषमा पुरिएका ठानिएको छ । एक्युमोली पर्यटकीय गाउँ हो । त्यहाँ करिब २ हजार ५ सय पर्यटक अलपत्र परेका छन् ।

इटालियाली राष्ट्रपति सर्जियो माटारेलाले यो विपत्ति ठूलो शोकको क्षण भएकाले सबैले मिलेर उत्तरदायित्व निर्वाह गर्न आग्रह गरेका छन् । प्रधानमन्त्री माटियो रेन्जीले रातारात प्रभावित स्थलमा पुगेर खाली हात उद्धारमा जुट्ने स्वयंसेवक र सुरक्षाकर्मीको प्रशंसा गरेका छन् ।

म्यानमारमा पनि ६.८को धक्का
मध्य म्यानमारमा ६.८ म्याग्निच्युडको भूकम्पमा परी पाकोक्कु नगरमा एक जनाको ज्यान गएको छ । बगन नगरको पुरातत्त्व विभागका एक प्रवक्ताका अनुसार भूकम्पका कारण त्यहाँका ६० भन्दा बढी बौद्ध चैत्यहरूमा क्षति पुगेको छ । राजधानी न्यापिडमा पनि संसद् भवनमा क्षति पुगेको छ । भूकम्पको झटका छिमेकी थाइल्यान्ड, बंगलादेश र भारतमा समेत महसुस गरिएका विवरणहरू प्राप्त भएका छन् ।

भूकम्पको केन्द्रविन्दु चौकदेखि २५ किलोमिटर पश्चिममा करिब ८४ किलोमिटर गहिराइमा रहेको यूएस जियोलिजिकल सर्भेले जनाएको छ । भूकम्पका बेला म्यान्मारको सबैभन्दा ठूलो सहर यांगुन र थाइल्यान्डको राजधानी बैंककका भवनहरूसमेत हल्लिएका थिए । धक्का बंगलादेश र भारतका गुवाहाटी, राँची र पटनामा समेत महसुस गरिएको थियो । भूकम्पपछि भारतको कोलकातामा भूमिगत रेल सेवा केहीबेर स्थगित गरिएको थियो । बंगलादेशको ढाकामा भूकम्पका बेला भाग्ने क्रममा करिब २० जना घाइते भएका छन् ।