गोरखा । गोरखामा किशोरीहरुका लागि पाठेघरको मुखको क्यान्सर बिरुद्वको खोप अभियान सम्पन्न भएको छ । अभियान अन्तरर्गत ९९.०३ प्रतिशत किशोरीहरुले खोप लगाएको प्रदेश जनस्वास्थ्य कार्यालय गोरखाका जनस्वास्थ्य अधिकृत नानीबावु दानीले जानकारी दिए ।
कार्यालयले जिल्ला भित्रको ११ स्थानिय तहमा कक्षा ६ देखी १० सम्मका र ११ बर्षदेखी १४ बर्ष तथा स्कुल बाहिर रहेका गरी कुल १० हजार २६८ जनालाई खोप दिने तयारी भएको भएता पनि १० हजार १४० जनाले मात्र खोप लगाएको उनले बताए ।
अधिकृत दानीका अनुसार कक्षा ६ वा १० बर्ष उमेरका २ हजार ५४ जना मध्ये २ हजार ७ जना, कक्षा ७ देखी १० सम्मका ८ हजार १६० जना मध्य ८ हजार ७३ जनाले खोप लगाएका थिए । तर स्कुल बाहिर रहेका भनिएका ५३ जनालाई खोप लगाउने भनिएता पनि ६० जना किशोरीहरुले खोप लगाएको पनि उनले जानकारी दिए ।
जिल्लामा गएको माघ २२ गतेदेखी २६ गतेसम्म मात्र सञ्चालन गर्ने भनिएको अभियान २ दिन लम्बिएर २८ गते मात्र समापन भएको थियो ।
उत्तरी गोरखाको चुमनुब्री गाउँपालिका अन्तरर्गतको बिहीमा माघ २७ गतेसम्म स्कुल बिदा भएकोले भोलीपल्ट २८ गते खोप दिदा २ दिन लम्बिएको थियो ।
अधिकृत दानीका अनुसार जिल्लामा खोप अझै बाँकी भएकोले कक्षा ६ देखी १४ बर्षका किशोरीहरुले खोप लगाउन बाँकी भएको भए गोरखा अस्पताल भित्र रहेको सामुदायिक क्लिनिकमा सम्र्पक राखी खोप लगाउन सकिने छ ।
कार्यालयले उपलब्ध गराएको तथ्यांक अनुसार चुमनुब्री, अजिरकोट र भिमसेन थापा गाउँपालिकामा शत प्रतिशत प्रगती भएको छ ।
यता सबैभन्दा धेरै किशोरी रहेको गोरखा नगरपालिकाले भने ९८.८४ प्रतिशत र पालुङटार नगरपालिकामा ९८.३१ प्रतिशत लक्ष्य अनुसारको प्रगती भएको देखिएको छ ।
