गोरखा । गण्डकी प्रदेशका मुख्यमन्त्री सुरेन्द्रराज पाण्डेले पर्यटन र कृषिलाई प्रदेश सरकारले प्राथामिकतामा राखेको बताएका छन् ।
नेपाल होटल व्यवसायी संघ गोरखाको आयोजनामा गोरखा सदरमुकाममा ‘ऐतिहासिक पर्यटन व्यवसायी भेला २०८१’ को उद्घाटन कार्यक्रमलाई बाेल्दै उनले समग्र गण्डकी प्रदेशको सम्बृद्धिको आधार पर्यटन क्षेत्र र कृषि क्षेत्र नै भएकाले यसलाई प्राथामिकतामा राखेर काम गरिरहेको बताए ।
कृषि र पर्यटनको क्षेत्रलाई लगानी गरेर मात्र गाउँमै रोजगारीको अवस्था सिर्जना गर्न सकिने उनको भनाई छ । गाउँमा रोजगारीको अवसार पाए ग्रामिण क्षेत्रबाट हुने बसाइसराइको अवस्थालाई पनि रोक्न सकिने मुख्यमन्त्री पाण्डेले बताए ।
‘‘ग्रामिण क्षेत्रबाट शहर बसाइ सर्ने, विदेश जाने अवस्था पनि भयावह बन्दै गएको छ, उनले भने, ‘‘प्रदेश सरकारले कृषिलाई व्यवासायीक बनाउन उत्पादनमा अनुदान कार्यक्रमलाई प्राथामिकतामा राखेको छ ।’’
गण्डकी प्रदेश भित्रका पर्यटकीय क्षेत्रको प्रचारप्रसारका लागि योजना बनाएर प्रदेश सरकारले काम गरिरहेको जानकारी दिदै उनले अब पर्यटकलाई ल्याउने मात्र भन्दापनि आएर बस्न सक्ने वातावरण निर्माण गर्नुपर्नेमा जोडदिए ।
‘‘सरकारले एक्कैले सवै कुरा गर्दियोस् भन्ने चाहेर मात्र पनि सम्भव छैन, मुख्यमन्त्री पाण्डेले भने,‘‘नीजि क्षेत्रको पनि ठूलो भूमिका र महत्व हुन्छ ।’’ उनले नीजि क्षेत्रलाई परेको अफ्ठयारा फुकाउन सरकारले आवश्यक सहयोग गर्ने प्रतिवद्धता व्यक्त गरे ।
