गोरखा । उत्तरी गोरखाको धार्चेमा रहेको रेसे फाँटका पहिरो पिडितलाई राहत उपलब्ध गराईएको छ । उनीहरुलाई लायन्स अन्तराष्ट्रिय डिष्ट्रिक ३२५ जे नेपालले राहत उपब्ध गराएको हो ।
रेसे खोलामा आएको बाढीले फाँटमा रहेका केही घरमा क्षती पुर्याउदा ५ जनाको मृत्यु भएको थियो भने २ जना गंभिर घाईते भएका थिए । उनीहरुको परिवारलाई लायन्स अन्तराष्ट्रिय डिष्ट्रिक ३२५ जे नेपाल आरुघाटमा एक कार्यक्रम गरी राहत वितरण गरेको थियो ।
धार्चे गाउँपालिका–५ को रेसे खोलामा गएको साउन १३ गते राती आएको बाढीमा परी ३५ बर्षिया कान्छीमायाँ गुरुङ, ७० बर्षका सुलाल कान्छा गुरुङ, ३७ बर्षका जितबहादुर गुरुङ, ३३ बर्षका रमेश गुरुङ र २४ बर्षका रमेश परियारको मृत्यु भएको थियो । सोही पहिरोमा परेर दिपिल गुरुङ र खमबहादुर गुरुङ गंभिर घाईते भएका थिए ।
पहिरोमा परेर मृत्यु भएका र घाईते भएका परिवारलाई लायन्स अन्तराष्ट्रिय डिष्ट्रिक ३२५ जे नेपालका डिष्ट्रिक गर्भनर मिलन थापाले राहत हस्तान्तरण गरेका हुन् ।
थापाले मृत्यु भएका र घाईते परिवारलाई ६० बोरा चामल, १२० लिटर खाने तेल, चिनी, मस्यौरा र दाल ६०–६० केजी, नुन १२० केजी, चियापत्ती १२ केजी तथा सिरक, डसना, सिरानी, म्याट्रेस र तन्ना ४०–४० थान उपलब्ध गराएको थियो ।
थापाले एलसिआईएफको राहत कोटा मार्फत प्राप्त उक्त सामाग्रीहरु लायन्स तथा स्थानिय जनप्रतिनिधीको रोहबरमा हस्तान्तरण गरेका हुन् ।