गोरखा । गोरखाको प्रमुख पर्यटकीय गन्तव्यका रुपमा मानिएको मनास्लु संरक्षण क्षेत्र घुम्न आउने पर्यटकबाट प्रवेश शुल्कमार्फत गएको दश महिनामा २ करोड ५२ लाखभन्दा बढी राजस्व सङ्कलन भएको छ ।
मनास्लु संरक्षण क्षेत्र आयोजना कार्यालय (एमक्याप)ले चालु आर्थिक वर्ष २०८०–८१ को साउनदेखि बैशाखसम्ममा मनास्लु क्षेत्र घुम्न जाने पर्यटकबाट प्रवेश शुल्कबापत २ करोड ५२ लाख ८७ हजार १०५ रुपैयाँ राजस्व सङ्कलन गरेको हो ।
साउनदेखि बैशाखसम्म उक्त क्षेत्रमा कुल ९ हजार ६३० जना पर्यटक घुम्न आएको आयोजनाको कार्यालयले जानकारी दिएको छ । घुम्न आएका मघ्य सार्क राष्ट्रभित्रका १९६ पर्यटक र अन्य ९ हजार ४३४ जना बिदेशी पर्यटकले उक्त क्षेत्रको घुम्न पुगेको मनास्लु संरक्षण क्षेत्र आयोजनाका संरक्षण अधिकृत एवं सूचना अधिकारी भूवन ओझाले जानकारी दिए ।
सोही अवधिमा सार्क राष्ट्रबाट १३७ जना पुरुष र ५९ जना महिला विदेशी पर्यटकले मनास्लु क्षेत्रमा घुम्न पुगेको थियो भने अन्य देशका ५ हजार ४०४ जना पुरुष र ४ हजार २६ जना महिला र ४ जना तेस्रो लिंगीले समेत उक्त क्षेत्र घुमेको सूचना अधिकारी ओझाले बताए ।
मनास्लु क्षेत्र घुम्न जाने सार्क राष्ट्रभित्रका पर्यटकसँग कार्यालयले प्रतिव्यक्ति १ हजार प्रवेश शुल्क लिँदै आएको छ भने अन्य देशका पर्यटकबाट प्रतिव्यक्ति ३ हजार प्रवेश शुल्क लिने गरिएको छ ।