काठमाडौं । जाजरकोट भूकम्ममा परी मृत्यु भएका रुकुमपश्चिमका पीडित परिवारलाई नगद राहत वितरण गरिएको छ । सानीभेरी गाउँपालिका–६ मा पीडित १० परिवारलाई रू १६ लाख र आठबीसकोट नगरपालिकाका २० घरपरिवारका ३१ जनालाई राहतबापत रू ५१ लाख गरी रू ६७ लाख रकम बाँडिएको जिल्ल्ला विपद् व्यवस्थापन समितिका संयोजक तथा प्रमुख जिल्ला अधिकारी हरिप्रसाद पन्तले जानकारी दिए ।
सानीभेरीबाट सुरु गरिएको नगद वितरण कार्यक्रम आठबीसकोटमा पुगेर समापन भएको थियो । उनका अनुसार जिल्लामा ४१ जना मृतक परिवारका सदस्यलाई नगद राहत उपलब्ध गराइएको हो । “अब जिल्लामा कागजात मिलाउन बाँकी रहेका ९ घरपरिवारका १२ मृतकको राहतबापतको रकम वितरण गर्न बाँकी छ ।
तीमध्ये ५ जना जिल्ला बाहिरका हुन् । जिल्ला बाहिरकालाई पनि सम्बन्धित जिल्लाबाट प्रक्रिया पुर्याएर यहीबाट नगद राहत वितरण गरिने छ”, प्रजिअ पन्तले भने । सङ्घीय सरकारबाट प्राप्त भएको राहत रकम मृतक परिवारलाई बाँडिएको उनले जानकारी दिए ।
सरकाकारले निर्णय गरे अनुसार प्रत्येक मृतक घरपरिवारलाई रू २ लाखका दरले राहत रकम दिएको जनाउँदै एकै घरबाट १ जना भन्दा बढी मृत्यु भएकामा रू २ लाखमा थप रू १ लाख बढाएर उपलब्ध गरिएको सहायक प्रमुख जिल्ला अधिकारी प्रवेश बढुवालले बताए । उनका अनुसार सङ्घीय सरकारले राहत वितरणका लागि जिल्ला विपद् व्यवस्थापन कोषमा रू ५ करोड पठाएको थियो ।
“हालसम्म रू ६७ लाख वितरण गरिएको छ । १२ जनाको राहतबापतको रकम वितरण गर्न बाँकी छ । बाँकी रकम भूकम्पपीडितका लागि अस्थायी आवास निर्माण तथा पुनःस्थापनामा खर्च गरिनेछ”, सहायक प्रजिअ बढुवालले भने ।
कात्तिक १७ गते राति गएको भूकम्पमा जिल्लाका ५२ र उपचारका क्रममा १ गरी ५३ जनाको ज्यान गएको थियो ।