काठमाण्डौं । सिभिल सेभिङ एण्ड क्रेडिट को–अपरेटिभ लिमिटेडको बचत तथा मुद्दती खातामा रहेको पैसा मध्ये करिब ७१ करोड रुपैयाँ ठगी गरेको आरोपमा प्रहरीले १२ जनालाई विभिन्न क्षेत्रबाट पक्राउ गरेको छ ।
सहकारीमा रहेको पैसा मध्ये उनीहरुले कूल ७० करोड ८७ लाख १३ हजार ८२१ रुपैयाँ ३२ पैसा रकम संगठित रुपमा सहकारी ठगी गरेको आरोपमा प्रहरील १२ जनालाई पक्राउ गरेको जनाएको छ ।
पक्राउ पर्नेहरूमा काठमाण्डौं कीर्तिपुर ट्याङलाफाँट घर भएका सिभिल सेभिङ एण्ड क्रेडिट को–अपरेटिभ लिमिटेडका पूर्व अध्यक्ष, पूर्व सभासद एवं सिभिल बैंकका अध्यक्ष ५७ वर्षीय इच्छाराज तामाङ, काठमाण्डौं महानगरपालिका १६ घर भएका सहकारीका संचालक समितिका अध्यक्ष ६२ वर्षीय केशवलाल श्रेष्ठ, काठमाण्डौं महानगरपालिका १२ घर भएका ६२ वर्षीय प्रबन्धक ६२ वर्षीय भगवानबहादुर सिंह, कीर्तिपुर नगरपालिका ९ घर भएकी मेनेजर ५० वर्षीया मायोनानी महर्जनलाई प्रहरीले पक्राउ गरेको हो ।
उनीहरु संगै भक्तपुर नगरपालिका ११ घर भएकी असिसटेन्ट मेनेजर ४४ वर्षीया एलिना तुलाधर, झापा घर भएका जुनियर अधिकृत ४५ वर्षीय शंकरप्रसाद पाठक, काभ्रे घर भएका असिसटेन्ट २५ वर्षीय संगित श्रेष्ठ, कीर्तिपुर नगरपालिका ९ घर भएका लेखा अधिकृत ३३ वर्षीय राकेश महर्जन, बुढानिलकण्ठ नगरपालिका ६ बस्ने सिन्धुली दुधौली नगरपालिका ७ घर भएका सहायक प्रबन्धक ४० वर्षीय बुद्धराज तामाङ, बुढानिलकण्ठ नगरपालिका ६ घर भएका सहायक प्रबन्धक ३७ वर्षीय कौस्तुभकेतन ढुंगाना, नुवाकोट विदुर नगरपालिका २ घर भएका सिभिल होम्सका वरिष्ठ प्रबन्धक ४३ वर्षीय विजय विक्रम शाह र काठमाण्डौं महानगरपालिका १४ कलंकी बस्ने मकवानपुर चित्तलाङ घर भएका पूर्व लेखा समिति सदस्य ४६ वर्षीय हरिहर लामिछाने पक्राउ परेको प्रहरीले जानकारी दिएको छ ।
सहकारीका निक्षेपकर्ता सदस्यहरुले जम्मा गरेको रकम बचत तथा मुद्दती खाताको अवधि पुगीसकेपछि खाताबाट रकम झिक्नको लागि सम्बन्धीत संस्थाका कर्मचारी तथा पदाधिकारीहरुलाई पटक पटक ध्यानाकर्षण गराउँदा समेत नियमानुसार पाउनु पर्ने निक्षेप तथा सोको ब्याज रकम उपलब्ध गराई दिनेतर्फ आवश्यक पहल नगरेको तथा उक्त लिमिटेडमा रहेका सर्वसाधारणको बचतको ठुलो हिस्सा सहकारी ऐन, २०७४ र सहकारी नियमावली, २०७५ को प्राबधान विपरीत एकै व्यक्ति संस्थापक रहेको बिभिन्न परियोजनाहरुमा लगानी गरेको र उक्त लगानीबाट प्राप्त लाभ चरम बेथितिका कारण संस्थाले प्राप्त गर्न नसकी उक्त लिमिटेड जोखिममा रही सहकारी संस्थाबाट कर्जा लगानी भई सम्पन्न गरिएका बिभिन्न परियोजनाहरुबाट निर्माण गरिएका संरचनाहरु बिक्री गर्दा प्राप्त रकम सहकारी संस्थामा नबुझाई विदेशी मुलुकमा समेत लगी सम्पत्ति शुद्दिकरणको कसूर गरेको हुनसक्ने हुँदा सहकारी ऐन, २०७४ को दफा (१२२) बमोजिमको कसूर गरेको देखिन आएकोले उक्त कार्यमा संलग्न उनीहरुलाई केन्द्रीय अनुसन्धान ब्यूरोबाट खटिएको प्रहरीले पक्राउ गरेको हो ।
उनीहरु उपर आवश्यक कानूनी कारवाही भइरहेको तथा अन्य निक्षेपकर्ता तथा सर्वसाधरणहरुले उक्त को–अपरेटिभबाट निक्षेप तथा ब्याज रकम नपाएको भए कानून बमोजिम आवश्यक थप कारवाहीको लागि समेत सोही ब्यूरोमा सम्पर्क गर्न हुन केन्द्रीय अनुसन्धान ब्यूरोले अनुरोध गरेको छ ।
