गोरखा समाचारदाता
काठमाण्डौं – संघीय संसद्को बजेट अधिवेशन आज (शुक्रबार)देखि प्रारम्भ हुँदैछ ।
राष्ट्रपति विद्यादेवी भण्डारीको आह्वान अनुसार अपराह्न ४ बजे दुवै सदनको बैठक प्रारम्भ हुन लागेको हो ।
कोरोना भाइरसको त्रासविच सुरु अधिवेशनको सुरक्षा लगायतका सम्पूर्ण तयारी संसद् सचिवालयले पूरा गरिसकेको छ ।
हिजो (बिहिबार) नै संघीय संसद्का सदस्यहरूको कोरोना परीक्षण पनि सुरु गरिएको छ । राष्ट्रपतिको अधिवेशन प्रारम्भसम्बन्धी पत्र पढेर बैठक प्रारम्भ हुनेछ । अधिवेशन प्रारम्भ भएको अवसरमा दलीय आधारमा शुभकामना मन्तव्यको सम्भावित कार्यसूची तय गरिएको छ ।
प्रतिनिधिसभामा अधिवेशन नभएको बेला निधन भएका पूर्व सभासद् विश्वनाथप्रसाद अग्रवालको निधनमा शोक प्रस्ताव पारित हुनेछ । यस्तै, सरकारले हालै दुई अध्यादेश जारीपछि साबिकका व्यवस्था पुनः जगाउन जारी गरेको केही अध्यादेश खारेज गरी नेपाल ऐनको साबिक व्यवस्था जगाउने अध्यादेश २०७७ दुवै सदनमा प्रस्तुत हुनेछ ।
चालू अधिवेशन सरकारका वार्षिक कार्यक्रम पेससँगै बजेट पनि प्रस्तुत हुनेछ । संवैधानिक समयसीमा अनुसार जेठ १५ गते बजेट प्रस्तुत हुनेछ । संसद् सञ्चालन नियमावलीको व्यवस्था अनुसार बजेट प्रस्तुतअघि कम्तीमा १५ दिन पहिले पूर्वबजेट छलफल हुनेछ ।
पूर्वबजेटपछि नीति तथा कार्यक्रममा छलफल हुनेछ । यस्तै, जेठ २ गते सङ्घीय संसद्को संयुक्त बैठकमा राष्ट्रपतिद्वारा नीति तथा कार्यक्रम प्रस्तुत गर्ने तयारी सचिवालयले गरेको छ ।
