बारा : बाराको सुर्वण गाउँपालिका-३ कबहीगोठस्थित नेपाल-भारत सीमामा रहेको सशस्त्र प्रहरीको अस्थायी पोष्टमा भारतीय नागरिकले बिहीबार दिउँसो आक्रमण गरेका छन् । लकडाउनको समयमा नेपाल प्रवेश गर्न खोजेका दुई भारतीय नागरिकलाई सशस्त्र प्रहरीका सुरक्षाकर्मीले रोकेपछि उनीहरुसहित केही भारतीय नागरिकले स-शस्त्र प्रहरीको पोष्टमा आक्रमण गरेका हुन् ।
नेपालतर्फ प्रवेश गर्न खोज्ने दुईजनालाई सशस्त्र प्रहरीले सीमाबाटै फर्काएपछि करिब एक सयको संख्यामा आएका भारतीय नागरिकले प्रहरी पोष्टमा क्षति पुर्याएको सशस्त्र प्रहरी उपरीक्षक दिगविजय सुवेदीले जानकारी दिए । भारतीय नागरिकले आक्रमण गर्न थालेपछि स्थिति नियन्त्रणमा लिन सशस्त्र प्रहरीले एक राउण्ड हवाई फायर गरेको छ ।
‘सीमा पारीबाट नेपालतर्फ आउन खोज्नेलाई रोकेर फर्काएपछि एक सयको संख्यामा भारततर्फका नागरिक आएर तोडफोड गर्न सुरु गरे,’ सशस्त्र प्रहरी उपरीक्षक सुवेदीले भने, ‘अस्थायी पोष्टमा सामान्य क्षति भएको छ । हामीले स्थिति नियन्त्रणमा लिन एक राउण्ड हवाई फायर गरेका हौं।’
सीमामा खटिने भारततर्फका सीमा सुरक्षा बल (एसएसबी)को समवन्यमा नभएर जबरजस्ती नेपाल प्रवेश गर्नेलाई रोक्न खोज्न स्थिति केहीबेर त नावपूर्ण बनेको सुवेदी बताए । केहीबेरको तनावस्थित अहिले स्थिति सामान्य बनेको सुवेदीले जानकारी दिए ।’अहिले स्थिति सामान्य भइसक्यो । क्षति पुगेको पोष्ट उनीहरुले नै बनाइदिने भएका छन्,’सुवेदीले भने ।
कोरोना संक्रमण फैलन नदिन दुबै देशका सरकारले सीमा क्षेत्रमा कडाई गर्न निर्देशन दिएका छन् । तर खुल्ला सीमाको फाइदा उठाउँदै दुवै देशका नागरिकले आवतजावत गर्न खोज्दा सुरक्षाकर्मीसँग विवाद हुने गरेको छ । दुई दिनअघि बाराको बिश्रामपुर ४ बलिरामपुरमा खेतमा गएका स्थानीयलाई भारतीय एसएसबीका जवानले रोकेपछि स्थिति तनाव पूर्ण बनेको थियो ।
