प्रतिकात्मक तस्बिर
गाेरखा । सामाजिक संजालको दुरूपयोग गरी डर/त्रास फैलाएकाे आराेपमा प्रहरीले गाेरखाका २ जना सहित ७ जनालाई पक्राउ गरेकाे छ ।
पक्राउ पर्नेहरूमा आरूघाट गाउँपालिका-७ आरुपाेखरी घर भएका २७ वर्षीय सुमन पराजुली र आरूघाट गाउँपालिका-६ आरुआरवाङ घर भएका २९ वर्षीय पदम बहादुर मगर सहित ७ जनालाई पक्राउ गरेकाे काठमाडौं उपत्यका अपराध अनुसन्धान कार्यालय टेकुले जनाएकाे छ ।
उनीहरु सगै प्रहरीले काठमाडौं महानगरपालिका-२६ पवित्र नगर बस्ने धादिङ गल्छी गाउँपालिका-१ घर भएका २९ वर्षीय रोमन आले, तनहुँ भानु नगरपालिका-७ घर भएका ३६ वर्षीय मनोहर थापा मगर, तनहुँ भानु नगरपालिका-११ घर भएका ३९ वर्षीय गुण बहादुर गुरूङ, भक्तपुर सूर्यविनायक बस्ने काभ्रे रोशी गाउँपालिका-७ घर भएका २६ वर्षीय रोशन तामाङ र काठमाडौं महानगरपालिका-७ सुकेधारा बस्ने दोलखा बैतेश्वर गाउँपालिका-३ घर भएका ३९ वर्षीय गोपाल मोक्तान रहेका छन् ।
उनीहरुले विभिन्न मितिमा तरवार, खुकुरी जस्तो धारिलो हातहतियार प्रयोग गरी टिकटक लगायतका सामाजिक संजालमा केक काट्ने वहानामा भिडियोहरू पोष्ट गरी सर्वसाधारणमा डर/त्रास सृजना गरी आतंकित बनाउने कार्यमा संलग्न रहेकाे आराेपमामा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीकाे टाेलीले काठमाडौंको विभिन्न स्थानबाट पक्राउ गरेको जनाएकाे छ ।
उनीहरूलाई आवश्यक अनुसन्धान तथा कारवाहीको लागि जिल्ला प्रहरी परिसर काठमाडौं पठाइएको छ ।
