गोरखा । गोरखाको भीमसेन थापा गाउँपालिका वडा नम्बर ७ मा रहेको सरस्वती माध्यामिक विद्यालयमा सुरु भएकाे बाल साहित्य महोत्सव सम्पन्न भएको छ । विद्यालयमा कक्षा १ देखि प्राविधिक धारसम्म अध्ययनरत बालबालिकाको क्षमता विकासका लागि महोत्सव आयोजना गरिएको थियो ।
महाेत्सवमा विद्यार्थीले आफ्नो इच्छाअनुसार कला प्रदर्शन गरेका थिए । गीत गाउँन जान्नेले गीत गाए, चित्र कोर्न जान्नेले चित्र कोरे, हस्तकलाका सामाग्री बनाउन जान्नेहरूमध्ये केहीले सारङी बनाएका थिए भने केहीले डोको, हलो बनाएर आफ्नो प्रतिभा देखाएका थिए ।
बाल साहित्य महोत्सव एकल क्षमता मात्र नभइ सामूहिक रुपमा मिलेरसमेत विद्यार्थीहरूले आफ्ना क्षमता देखाएका थिए । हरेक बालबालिकामा कुनै न कुनै क्षमता हुने भए पनि देखाउने अवसर नपाउँदा उनीहरूको प्रतिभा खेर जाने अवस्था रहेकाले यस्ता खालका कार्यक्रमले बालिबालिकाको प्रतिभा पहिचान गर्न महत्वपूर्ण सहयोग पुग्ने विद्यालयका प्रधानध्यापक राजाराम इटनीले बताए ।
बाल साहित्य महोत्सवले बालबालिका भित्र रहेका अन्तरनिहीत क्षमतालाई उजागर गर्न मद्दत पुग्ने रातो बङ्गला फाउण्डेनका भरत घिमिरेले बताए ।
गाउँपालिकामा पहिलो पटक सञ्चालन गरिएको कार्यक्रम पालिका भित्रका १२ वटा माध्यमिक विद्यालयमा आयोजना गर्ने लक्ष्य रातो बङ्गला फाउण्डेसनको साझेदारी कार्यक्रम र भीमसेन थापा गाउँपालिकाकाले गरेको छ ।