गोरखा । गोरखामा पाठेघरको मुखको क्यान्सर रोकथामका लागि १० हजार भन्दाबढी किशोरीहरुमा एचपिभी खोप लगाइने भएको छ ।
यही माघ २२ गतेबाट सञ्चालन गर्न लागिएको खोप अभियानमा १० हजार १६८ जना किशोरीलाई एचपिभी खोप लगाइने स्वास्थ्य कार्यालय गोरखाका खोप कोल्डचेन निरीक्षक नानीबाबु दानीले जानकारी दिए ।
अयिभान अन्तरर्गत विद्यालयमा अध्ययनरत कक्षा ६ देखि १० सम्मका छात्राहरुलाई खोप लगाइने छ । खोप अभियान २ दिनसम्म सञ्चालनमा आउने उनले जानकारी दिए ।
याे अभियान अन्तरर्गत १० देखि १४ बर्षसम्मका उमेर समुहका किशोरीहरुलाई खाेप लगाइने छ । अभियान सञ्चालनका लागि जिल्ला भित्र १९६ खोप केन्द्र निर्धारण गरिएको छ ।
अभियान सञ्चालनका लागि स्वास्थ्यकर्मी एवं स्वयंम सेवकहरुलाई तालिमहरु सञ्चालन गरिरहेको छ । याे अभियानमा गोरखा नगरपालिकामा मात्रै २ हजार ५७३ जना किशोरीहरुले खोप लगाउन पाउने छन् ।