गोरखा । गोरखा सदरमुकामदेखी पश्चिम उत्तरमा रहेको भच्चेक आधारभूत अस्पतालले केही दिनभित्रै नयाँ भवनबाट सेवा दिने भएको छ ।
अजिरकोट गाउँपालिका–३ को भच्चेक बजारमा रहेको उक्त अस्पतालले यही माघ १ गतेदेखी नयाँ भवनबाट सेवा दिन लागेको डा.रामानन्द चौधरीले बताए ।
‘अहिले अस्पताल सञ्चालनमा रहेको भवन धेरै पुरानो र जिर्ण भयो’ उनले भने ‘नयाँ भवन बनेर तयारी अवस्थामा छ । माघ १ गतेदेखी नयाँ भवनबाट सेवा दिन्छौ ।’ नयाँ भवन बनेर पनि ठेकेदार कम्पनीले हस्पतान्तरण गरीसकेको छ । तर भवनमा आवश्यक फर्निचर नभएका कारण नयाँ भवनबाट सेवा दिन ढिला भएको उनले बताए ।
‘ठेक्का अनुसार भवन निर्माण भएर ठेकेदार कम्पनीले हस्तान्तरण गर्यो’ उनले भने ‘तर त्यसमा आवश्यक फर्निचर ठेक्का भित्र नपरेकाले हामीले बनाउदै छौ । आज भोलीमा फर्निचरको काम पनि सकिन्छ ।’ अजिरकोट गाउँपालिका मार्फत सञ्चालनमा आउने उक्त अस्पतालमा अहिले आवश्यक फर्निचरहरु धमाधम बन्दै छन् ।
डा.चौधरीका अनुसार पुरानो अस्पतालको काम लाग्ने सामान पनि नयाँ भवनमा सार्ने र नपुग्ने फर्निचरमात्र बनाउन लागिएको हो । फर्निचर बनेर फिटीङको काम समेत अन्तिम चरणमा भएकोले माघ १ गतेदेखी नै नयाँ भवनबाट सबै सेवा सञ्चालनमा आउने छ ।
५ बेडको उक्त अस्पतालको नयाँ भवन ७ करोडमा निर्माण सम्पन्न भएको हो । प्रदेश सरकार मार्फत बनेको उक्त भवनमा सोलार र ईन्टरनेट तथा स्विचिङका सबै काम सम्पन्न भएको छ ।
बिरामी तथा कुरुवाको सुविधाको लागि केही दिन अगाडी मात्र नेपाल टेलिकम मार्फत फाईबर हालेर ईन्टरनेट सेवा जडान गरीएको छ । सुविधा सम्पन्न उक्त भवनमा अन्तरंगत तथा बहिरंग सहित, शल्यक्रिया कक्षको समेत स्थापना गरीएको छ ।
१ जना डाक्टर, ३ जना नर्स, ६ जना अहेब, १ जना हेल्थ असिस्टेन्ट, ३ जना कार्यालय सहयोगी र १ जना एम्बुलेन्स चालक सहित रहेको अस्पतालले सार्वजनिक बिदाको दिन बाहेक सबै दिन बिरामी जाँच, चौबिसै घण्टा आकस्मिक तथा प्रसुती सेवा, गर्भ पतन तथा परिवार नियोजन, भिडियो एक्सरे, ईसिजी, प्रयोगशाला, एम्बुलेन्स सेवा तथा चौबिसै घण्टा औषधी बितरण कक्ष खोल्ने गरीएको डा.चौधरीले जानकारी दिए ।
उनका अनुसार अस्पतालको आफ्नै फारर्मेशीबाट बिरामीहरुले औषधी खरिद गर्दा ३० प्रतिशतसम्मको छुटको ब्यवस्था गरिएको छ ।
अस्पतालले बिरामीहरुलाई ९२ प्रकारको औषधीहरु निःशुल्क बितरण गर्दै आएको छ । त्यस बाहेकका औषधी खरिदमा बिरामीले छुट पाउने ब्यवस्था मिलाएको पनि डा.चौधरीले जानकारी दिए ।
सामान्यतया दैनिक जसो २० देखी २५ जना बिरामी जाँचका लागि आउने भएता पनि कुनै दिन ८० जनासम्म बिरामीले उक्त अस्पतालबाट सेवा लिएको अस्पतालको रेकर्डमा देख्न सकिन्छ ।
अस्पतालले लैंगिक तथा यौन हिंसामा परेका पिडितलाई परापर्श दिनुका साथै आयुवैध सेवा, आँखा उपचार, निःशुल्क क्षयरोगको औषधी बितरण तथा परामर्श तथा प्रत्येक महिनाको १४ गते गर्भवती आमाको निःशुल्क भिडियो एक्स–रे गर्दै आएको पनि उनले बताए ।