गोरखा । भोली बिहानदेखी हुने मनकामना मन्दिरदेखी गोरखाकालीसम्मको म्याराथनको तयारी पुरा भएको छ । जिल्ला खेलकुद बिकास समितिको आयोजना हुन लागेको म्याराथनको तयारी पुरा भएको अध्यक्ष शान्तसिं बस्नेतले जानकारी दिए ।
जिल्ला आयोजित म्याराथन दोस्रो भएपनि मनकामना मन्दिरदेखी गोरखाकालीसम्मको यो म्याराथन भने पहिलो हो ।
४२ किलो मिटर १९५ मिटर को म्याराथनमा करिब २२५ जनाको सहभागिता रहने अनुमान समितिले गरेको छ ।
नेपालका म्याराथन खेलाडी एवं गोरर्खाली टिका बोगटीको प्राविधिक सहयोगमा हुने म्याराथन भोली (शनिबार) बिहान ८ः१५ बजे एक कार्यक्रम बिच मनकामना मन्दिरको प्रागढबाट सुरु हुने छ ।
समितिले तयारी स्वरुप १० स्थानमा हेल्थ डेष्क राखेको छ भने ५ वटा एम्बुलेन्स समेत तयारी अवस्थामा राखेको छ । त्यसका अलावा म्याराथनमा सहभागिहरु थाकेर निर्धारीत दुरी पार गर्न नसक्नेहरुलाई २ वटा बसको समेत ब्यवस्था गरेको छ ।
म्याराथनमा राष्ट्रिय स्तरका १० भन्दा बढी धावक सहभागी भएका छन् । नेपाली सेना र शसस्त्र प्रहरीको समूहले पनि म्याराथनमा सहभागिता जनाएको आयोजक खेलकुद बिकास समितिका अध्यक्ष बस्नेतले जानकारी दिए ।
२२ लाख रुपैयाँ खर्च हुने अनुमान गरिएको म्याराथनमा पहिलो, दोस्रो र तेस्रो हुनेलाई क्रमश. १ लाख ५० हजार, १ लाख र ५० हजार नगद प्रदान गरिने भएको छ । त्यस्तैगरी सहभागी भएका १० जना धावकलाई नगद पुरस्कारको ब्यवस्था गरिएको छ ।
म्याराथनमा सहभागी भएका मध्ये गोरखा जिल्लाबाट सहभागी भएका धावकले निर्धारीत दुरी पार गरेको खण्डमा नगद १२ हजार र धावक मध्ये सबैभन्दा कम उमेरकोलाई पनि नगद १२ हजार प्रदान गरिने भएको छ ।
म्याराथनमा हालसम्म सबैभन्दा बढी ६३ बर्ष र सबैभन्दा कम उमेरको १५ बर्षका धावकले नाम दर्ता गराएको अध्यक्ष बस्नेतले बताए ।
निर्धारीत दुरी पार गरेर भोली ११ः३० धावकहरु गोरखकाली मन्दिर प्रवेश गर्ने अनुमान गरीएको छ ।