प्रतिकात्मक तस्बिर
गोरखा । अनलाईन ठगी आरोपमा गोरखा छोप्राकका १ जना युवक सहित प्रहरीले ३ जनालाई राजधानीको विभिन्न स्थानबाट पक्राउ गरेको छ ।
पक्राउ पर्नेमा गोरखा जिल्ला सिरानचोक गाउँपालिका–५ छोप्राक घर भइ हाल काठमाडौं महानगरपालिका–२६ सामाखुशी बस्ने बर्ष १९ का विपिन मग्राती, झापा बिर्तामोड नगरपालिका–३ घर भई हाल काठमाडौं महानगरपालिका–४ महाराजगंज चप्पलकारखाना बस्ने बर्ष २१ का अजित भण्डारी र नुवाकोट म्यागङ गाउँपालिका–२ घर भई हाल काठमाडौं महानगरपालिका–१६ माछापोखरी बस्ने बर्ष २१ का मधु तामाङ रहेका छन् ।
तिनै जनालाई काठमाडौं उपत्यका अपराध अनुसन्धान कार्यालय टेकुबाट खटिएको प्रहरीको टोलीले पक्राउ गरेको हो ।
उनीहरुले सामाजिक सञ्जाल फेसबुक मार्फत विभिन्न पेजहरु खोली आइफोन सस्तो मूल्यमा बिक्रीमा रहेको झुठा विज्ञापन पोष्टगरी एडभान्समा रकम लिएको उजुरीको आधारमा प्रहरीले पक्राउ गरेको जनाएको छ ।
पक्राउ परेका सबैलाई ठगी सम्वन्धी कसूरमा आवश्यक अनुसन्धान तथा कारवाहीको लागि जिल्ला प्रहरी परिषर भद्रकाली बुझाइएको काठमाडौं उपत्यका अपराध अनुसन्धान कार्यालय टेकुले जानकारी दिएको छ ।
