काठमाडौं । कञ्चनपुरमा निर्मला पन्तकाे बलात्कार पछी हत्या भएकाे प्रकरणमा आफू प्रत्यक्षदर्शी भएको भन्दै अन्तर्वार्ता दिने गाेरखाका नवराज अर्याललाई आज प्रहरीले पक्राउ गरेकाे छ ।
उनलाई केन्द्रीय अनुसन्धान ब्यूरो (सीआईबी) को टोलीले पक्राउ गरेको प्रहरी उपरिक्षक होविन्द्र बोगटीले बताए । गलत विवरणसहित दुष्प्रचार गरेको आरोपमा उनलाई नियन्त्रणमा लिइएको प्रहरीले जनाएको छ ।
बोगटीका अनुसार उनले टेलिभिजनमा दाबी गरेका सबै विवरण झुठा भएकाे भन्दै सोधपुछका लागि नियन्त्रणमा लिएकाे हाे ।
उनले आफूलाई खानेपानी विभागको सवारी चालकका रुपमा चिनाएका थिए । त्यसक्रममा कञ्चनपुर पुगेको बेला निर्मलाको बलात्कार हुँदै गरेको देखेको विवरण उनले अन्तर्वार्तामा सुनाएका थिए ।
अन्तर्वार्ता दिने टेलिभिजन कार्यक्रम प्रस्तोता ऋषि धमलालाई पनि सीआईबीले कार्यालयमा बोलाएको छ ।