गोरखा । गोरखा बजार क्षेत्रमा महिलाको गलाबाट सिक्री चोरी गरेको आरोप लागेका २ जना पुरुषलाई पुर्पक्षका लागी कारागार चलान गरिएको छ ।
गोरखा जिल्ला अदालतको आदेशले उनीहरुलाइ पुर्पक्षकोलागी कारागार चलान गरीएको जिल्ला प्रहरी कार्यालय गोरखाका प्रहरी नायब उपरिक्षक एवं सूचना अधिकारी ईन्द्रप्रसाद सुवेदीले जानकारी दिए ।
कारागार चलान भएका युवाहरुमा गोरखा जिल्ला शहिदलखन गाउँपालिका–९ नामजुङका बर्ष ३८ का सुनिल बिक र ललितपुर जिल्ला ललितपुर उपमहानगरपालिका–१६ का ३७ बर्षिय शैलेष ताम्राकार रहेका छन् ।
कारागार चलान गरीएको बिक र ताम्राकारले गोरखा बजारको रोहटेपानी र काडाँघाँरी क्षेत्रबाट २ जना महिलाको गलाबाट २–२ तोलाको सुनको सिक्री चोरी गरेको आरोप लागेको छ ।
प्रहरीले चोरी भएको भनिएको २ थान सिक्री राजधानीको एक पसलबाट नियन्त्रणमा लिएको जनाएको छ ।
उनीहरुले साउन २३ गते गोरखा नगरपालिका–७ रोहटेपानीमा हिडीरहेकी ७५ बर्षिया रत्नकुमारी मग्रती र भाद्र २४ गते गारखा नगरपालिका–६ को काडाँघाँरीमा बाख्रा चराईरहेकी ५९ बर्षिया दाउरीमायाँ राना मगरको गलाबाट सिक्री चोरी गरेको अनुसन्धानबाट खुल्न आएको पनि सूचना अधिकारी सुवेदीले जानकारी दिए ।
उनीहरु पुन असोज ५ गते गोरखा बजार क्षेत्रमा देखिएको विशेष सूचनाको आधारमा प्रहरीले उनीहरुलाई गोरखा नगरपालिका–९ को लक्ष्मीबजारबाट नियन्त्रणमा लिन सफल भएको थियो ।
प्रहरीले उनीहरुले प्रयोग गरेको बा. ४५ प ५४९३ नम्बरको प्लेजर स्कुटी समेत नियन्त्रणमा लिएको थियो ।