गोरखा । छिमेकी जिल्ला मानिएको नवलपुरमा सुंगुर बंगुरमा अफ्रिकन स्वाइन फिवर देखिएको भन्दै गोरखा किसानलाई सर्तक सहन आग्रह गरीएको छ ।
नवलपुरको पालिनन्दन गाउँपालिका–२ मा रहेका केही किसानहरुको घर पालुवा बंगुर-सुंगुर तथा बदेलमा समेत स्वाइन फिवर देखिएको भन्दै उच्च सतर्कता अपनाउन भनिएको भेटेरिनरी अस्पताल तथा पशु सेवा बिज्ञ केन्द्र गोरखाका प्रमुख अनन्त कोइरालाले बताए ।
केन्द्रले केहीदिन अगाडी मात्रै सूचना जारी गर्दै गोरखाको सम्पुर्ण बंगुरपालक कृषकलाइ उच्च सर्तकता अपनाउन भनेको छ ।
यो रोग अत्यन्तै संक्रामक सरुवा रोग भएको हुँदा रोगी पशुको शिधा सम्पर्क, संक्रमित दानापानी र ढुवानीको साधनहरुका साथै किर्नाको टोकाइबाट पनि रोग सर्ने भएकोले किसानले उच्च सतर्कता अपनाउन भनेको केन्द्र प्रमुख कोइरालाले बताए ।
रोग लागेका बंगुर सुंगुरमा उच्च ज्वरो आउने, शरिरको विभिन्न भाग रातो हुनुका साथै कान, छाती, नाक र पुच्छरमा रगत जमेर निलो धब्बा देखिने गर्दछ । यो रोग लाग्ने पशुको सत प्रतिशत मृत्यु हुने पनि सेवा केन्द्रले जानकारी गराएको छ ।
केन्द्रले यो रोगको रोकथामको लागी बंगुरपालक कृषकहरुले आफ्नो फार्मको जैविक सुरक्षामा जोड दिन भनेको छ । जैविक सुरक्षा बिधी अन्तरर्गत बंगुरको खोर वरपर फर्मालिन वा भिरकोन जस्ता डिसइन्फेक्टेट औषधी दिनहु छर्कन, ब्यक्ती तथा ढुवानीको साधनहरुलाई खोर प्रवेशमा निषेध गर्न, कृषक तथा कामदार आफै पनि खोरमा जाँदा वा फर्किएर आउदा कपडा फेरर वा डिसइन्फेक्टेट औषधी छर्केर मात्र खोरमा प्रवेश गर्न केन्द्रले आग्रह गरेको छ ।
भान्सा तथा होटलबाट ल्याइएको जुठो खानामा पनि त्यस्ता संक्रमण हुनसक्ने भन्दै केन्द्रले सकेसम्म त्यस्ता खानाखान नदिने र दिनै परेको खण्डमा आधा घण्टा पकाएर मात्र खान दिन भनेको छ ।
गोरखा जिल्लामा गत बर्षको रकर्ड अनुसार जिल्ला भर ६ हजार २४८ वटा बंगुर पालन गरिएको केन्द्रका प्राविधिक टिका नेपालीलले जानकारी दिए । उनका अनुसार गत बर्ष गोरखामा स्वाइन फिवरबाट करिब किसानका ३० वटा बंगुरको मृत्यु भएको थियो ।
जिल्लामा बंगुर पालनको पकेट क्षेत्र नभएता पनि सदरमुकामको गोरखा नगरपालिका र संगै जोडिएको शहिद लखन गाउँपालिकामा ब्यवसायीक रुपमा किसानले फार्म मार्फत बंगुर पालन गर्दै आएको प्राविधिक नेपालीले बताए ।
